#التربية
دخلت الاخت الشقراء وبجوارها اختها السمراء لاستقبال الضيوف
وبدأت عبارات المدح والثناء للاخت الشقراء
والاخت السمراء واقفة بدون حراك تستمع فقط
وجاءت الام وسمعت اهازيج المديح مره اخرى
شهالجمال شهالعيون تخبل شكد حلوة شعر مثل الذهب والعيون عبالك بحر تخبل
زين شو اختها متشبها شعجب؟!
ليش سمره 😕
فتقول الام : والله مدري ليش طلعت على اهل زوجي!!
احنا كلنا شگر ونخبل
بس هي حضها بعد!!!!!
قال رسول الله صلى الله علية وسلم : (اتقوا الله واعدلوا بين اولادكم)
يعني بالعراقي حطوا الله بين عيونكم وعاملوهم بالمثل، تمدح واحد منهم لازم تمدح اخوته وياه
تجيب هديه لواحد منهم ، تجيب لاخوته وياه
توزع الاكل بالمواعين، تنطي لكل واحد حاجته ،
اكيد مو نفس الكميه لان الفكره مو بالمساواة وانما بالعدل
المثال السابق متكرر هواي وهواي كلش وعلى مر الاجيال
واثارة السلبية جدا كبيرة وعميقة في نفس الطفل
وهو امر حرام شرعا ومعيب اخلاقيا
كلش غير لائق من الام من تنتقد شكل احد ابنائها وتمدح اخر!
وغير لائق ايضا ان تسمح لكائن من يكون ان يحط هاي الفروقات بين الاخوه على اساس الشكل واللون
التصرف الصحيح؟
شعجب اختها سمره؟
وشبيها السمره تخبل دمها يلعب مثل الجمر
ليش متشبه اختها؟
وليش حتى تشبها كل وحده جمالها
تخبل اختها شلون عيون
اي ما شاء الله عيونها حلوة وعيون اختها السود مثل الغزال
لو اكو كاميرا ترصد هاي المواقف جان كدرنا نشوف نضره الحسرة والالم بالموقف الاول،
ونضره الارتياح والقبول بالموقف الثاني
واحب اذكر، عسى ان تنفع الذكرى
الموضوع مو فقط اخلاقي وديني، وانما يمتد الاثر ان الاهل الي يفروقون بين ابنائهم يكون الابناء اعداء لبعض متشاجرين ومتنافرين ماكو الفه بيناتهم، لان الاهل يزرعون العداوة والبغضاء بيناتهم بالمقارنات السطحيه الشكلية
ويمتد الاثر ان يميل الاخ المهمش الى ان يكون عاق في المستقبل لانه يشعر انه لم يتلق اهتمام كافي ليرده لاهله
واعيد واكرر ،
ابنائنا امانه ، وهالله هالله بيهم
د.اسماء اسماعيل البدري