تعليق قريته في احدى الكروبات
تكول بي الام انها ام لتوأم
ورغم هذا تطلع وتتونس وتحاول بكل الوسائل المتاحه ان ترفه عن نفسها واطفالها
ومتعيش دور الام الي عود لازم تشيل كلشي فوك راسها وتركض ليل ونهار واعصابها منهارة من التعب والضغط وقلة النوم خاطر تكول
(اطفالي مسؤليتي وحدي)
هاي المقولات وان كان معناها صحيح ، فهي دتصير طريقة لدس السم في العسل
يعني طبعا اكيد وشي منتهين منه ان الاطفال مسؤلية الام
بس مو صحيح مسؤليتها وحدها
همه مسؤلية الاب مثلها مثل الام
ومسؤلية الدولة والمجتمع ككل
وهذا الشي للاسف ديتغيب يوم بعد يوم
باغلب وسائل التواصل نشوف ظاهره عود المجتمع تعبان وماله خلك جهال والي عدها اطفال لازم ما تزعج المجتمع ولا تزعج اي احد وتبقى محبوسه بالبيت
والي تسوي العكس (الي تطلع وتعيش بشكل طبيعي) تنتقد بشكل لاذع
قال رسول الله صلى الله عليه وسلم
(كلكم راع وكلكم مسؤل عن رعيته)
ال كلكم ، لاتشمل فقط الام والاب
كلكم كل شخص هو عنده مجموعه مسؤليات تبدي من اقرب الناس لابعد الناس
المهم نرجع لصاحبه التعليق تكول بكل طلعه اخذ واحد من اقاربي وغالبا يكون شاب او شابه وتخلي وحده من الاطفال يمه ، والطفله الثانيه وياها وبنفس الوقت متبخل عليهم لا بهديه ولا بفلوس ولا كلمه طيبه
فبالتالي ميحسون بالاستغلال ولا يحسون هي كاعد ( تذب مسؤليتها براسهم)
هي اختارت هالشي وطبعا مو ضروري كلنا نختار نسوي مثلها
بس ضروري نتراحم وضروري نوزع المهام وضروري تفهم الام انها حتى تكون ام صالحه ومربيه حقيقه لازم تعرف شلون تصرف الضغط ومتبقى تشيل كلشي براسها وتالي تنفجر بوجه الطفل
ونعيد ونذكر
الاطفال مسؤليتنا كلنا كمجتمع كامل
وكل واحد بينا خل يقدم احسن ماعنده طالما يكدر،
ونذكر العطاء ماينقص منا بالعكس 🍃❤️
.
.
.
د.اسماء