هذه العقوبة يستخدموها لتحسين انضباط الطفل
فكرتها انه تخلي الطفل بمكان كلش ممل لعدة دقائق ( حسب العمر )
هالعقوبة فعلا تعني انتهى الوقت، لا اهتمام لا لعب لا اي شيء ثاني
هواية اهالي جربوها وشافوها كلش مفيدة أكثر بهواية من الصياح والضرب والتهديد
مفيدة بحالات مثل نوبات الغضب و عدم اكتراث الطفل بتعليماتكم او ضربه لأحد الاطفال او كسره لقوانين البيت
اذا فشلت هالعقوبة فعادة سبب الفشل هو الخطأ بتطبيقها ، من الضروري انه تطبقها بحذافيرها بدون تغيير
العمر المناسب لتطبيقها من سنة ونصف الى ١٠ سنوات
الأطفال يسوون هواية شغلات، بيها الصح، بيها الغلط، بيها الخطير
عدنا ثلاثة اصناف من هاي الشغلات اذا سواها طفلكم فهو يستحق عقوبة التايم اوت
الصنف الأول:
الأطفال الي ما يتبعون تعليمات اهلهم ، اي طفل تقوله سوي كذا وما ينفذ كلامك خلال ٥ ثواني لازم يتعاقب ، ميصير تقرر قرار وانت ما مستعد تخلي الطفل ينفذه ! راح تفقد احترامهم لقراراتك الي تصير بس حجي بلا تطبيق
كذلك ميصير تنطي أكثر من تحذير ، اكو اهالي ينطون قرار معين والطفل ميطبقه، يحذروه يمكن ١٠ مرات قبل لا يعاقبوه ، بهيج حالة الطفل يتعود قبل عاشر تحذير يلا ينفذ الي تريدوه منه
مثل ما طفلكم علمتوه انه بعاشر تحذير يلا ينفذ يكدر يتعلم انه بعد اول تحذير لازم ينفذ والا يتعاقب
الصنف الثاني :
الطفل يتعاقب اذا تصرف تصرف غير مقبول حسب رأي الأهل ( مثل نوبات الغضب، الضرب، العض، كسر قوانين المنزل )
الاستمرارية بتطبيق عقوبة التايم اوت كلش مهمة، ببداية تطبيقها يفضل انه تطبقوها على تصرف واحد غلط او تصرفين فقط بعدين لمن يترك هذه الشغلات ويتحسن انضباطه تبدون تضيفون تصرفات غلط اخرى للقائمة اذا سواها يتعاقب بسببها حتى شوية شوية يتعلم الطفل يترك التصرفات السيئة و
الصنف الثالث هو التصرفات الخطيرة الي يسويها، اي تصرف خطير يسويه ممكن يضر بصحته لازم يتعاقب عليه حتى ميكرره
التكملة في المنشور القادم …
( ملاحظة : لا تطبقها الا اذا قريت كل المنشورات الي تشرحها )
—
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال