اكو كم كلمه اريد اكتبها من زمان اهون بيها بعض الشيء تعب الامومه و الابوة و أوضح مسار الصفحه في تسهيل الامومه
يا ام و يا اب
و الأم اولا
كل تصرف منك كل نصيحه كل كلمه كل نظره كل توجيه كل طلب هي تربيه و راح تجيب نتيجه مو اليوم فيما بعد
الامومه مو سهله ابدا و لا الابوة
بس اكو مسهلها و يشوف اساسيات الرعاية بالاطفال مبالغه
أولادي و بناتي بمختلف المراحل العمريه و للان اشوف مشاكل بلبسهم و ترتيبهم
اللي يخربط بين وجه و ظهر التيشرت
و اللي يلبس الحذاء بالعكس
و اللي يعاند بالنوم
و اللي يعاند بالدراسه
و صارلنا أشهر و سنين نعلم و النتائج ما اكول مبهره و إنما أقرب للسيئه
السؤال هل مليت؟ بس مليت اصلا طكيت
هل امهم ملت؟ اي و من زمان
بس هل كففنا عن محاوله تعليمهم؟
الجواب لا
أحيانا اريد ان اسلك الطريق الاسهل و اسوي الشغله بمكانهم و افضها بس هنا ما علمت و لا ربيت و لا سويت اللي عليه باعتباري راعي و مسؤول عن رعيتي
اخذوها مني و من أهلكم و من تجارب الحياه
اذا ما تعلم طفلك عمره ما راح يتعلم
اذا ما بطلت مقارنه بين طفلي و اطفال اخرين راح اضغط على نفسي و على أولادي
و لازم اعرف انه كل شيء أعلمهم عليه هو مهاره تاخذ وقت لما يتعلمون عليها و انه لا استسلم لليأس ابدا
و الاهم من هذا كله انه اذا ظليت ألومه بدل ما اشجعه راح يطلع شخصيه هشه مسحوقه فاقده الثقه
بالاخير اكول
بلا سباق قليلات العقول و قليلي العقول اللي يريدون ابنهم يمشي قبل ابن جيرانها و يتعلم كلشي و يطلع الأول بكل شيء راح يتعلمون بس بهدوء
اهم شي تعرفوه انه احنا نربي شخصيه مو نربي أشخاص يعيشون حياتهم مثل ما احنا نريد
التربيه صعبة
د. سيف سمير البياتي اخصائي طب الاطفال
from د. سيف سمير البياتي