اجانا طفل داخل بتسمم دم جرثومي و عجز كلوي حاد
كل طبيب اجى عالاهل كان يسألهم منطين سگوة ؟ يكولون لا
بالنهاية تبين انهم منطين خلطة عشبية للغازات
والي هي عالاكثر مجانت غازات ولا مغص
انما البكاء كان بسبب الالتهاب الي يزيد شوية شوية والاهل بكيفهم يشخصون ويكولون مغص او غازات
الطفل كريات دمه البيض الي تصعد بحالات الالتهاب واصلة ٤٦ الف
والطبيعي اقل من ١١ الف
الصفائح الدموية واصلة ٢٩ الف والطبيعي فوك ال ١٥٠ الف
بسبب نقص الصفائح ما كدرنا ندخله غسل بريتوني
وبسبب نقص الصفائح صار خروجه لونه اسود يعني اكو نزف بالمعدة سبب هاللون
نرجع ونكول
لا لاعطاء الاعشاب للاطفال
لان العشابين ماعدهم شهادة دراسية دكتوراه بالاعشاب ولا دارسين عليها اصلا
ولا يعرفون المواد الفعالة بيها
اغلبهم متعلميها بالتجربة و الممارسة واليوتيوب الي كله كذب وهالشي غلط بغلط
هل الاعشاب او الالتهاب هو سبب العجز الكلوي الاساسي؟ الله اعلم
اهم شيء نتجنب الخلطات المجهولة والي ما نعرف مضارها
د سلمان داود
مقيم اقدم اطفال
from د. سيف سمير البياتي