ماكو شي اسمه مناعه ضعيفه
هذه الجمله #مناعه_ضعيفة و جملة #ابني_ما_ياكل هي الصفه المتلازمه لكل شخص عراقي
امراض نقص المناعه معروفه و مشخصه و اهمها و اشهرها الإيدز
موضوع ان الطفل أنفه ٢٤ ساعه على مدى الشتاء أنفه يرشح
هذا مو دليل نقص مناعه و لا دليل نقص فيتامينات
أولادي خلال الشهر الماضي تمرضوا 5 مرات و كل مره سعال و رشح و حراره و اكلهم جيد و مناعتهم جيده
تعالوا نروح ابعد و نشرح شويه
💙المناعه هي قدره الجسم على محاربه الأجسام الدخيله
و المناعه بيها أصناف
مثلا الجلد يحمي الأعضاء الداخليه
و خلايا الدم البيضاء تقتل الجسم الغريب
و اكو أجسام مضاده
حتى السعال اللي يسويه جسمك هو طريقه مناعه حتى يطرد الجسم الغازي
موضوع ضعف المناعه هو مرض شديد و مشخص و بيه انواع و الضعف هذا من الولاده او لا سمح الله انت مصاب بالأيدز او تاخذ ادويه مثبطه للمناعه مثل ادويه السرطان
💙 موضوع انه كل فتره طفلك ترتفع حرارته هذا شي جيد و يدل على أن مناعه طفلك شغاله
💙 موضوع انه طفلك تصير عنده نشله بالسنه ١٢ مره طبيعي و اعتيادي و متوقع
💙 عادي جدا انه الطفل يتمرض و ترتفع حرارته و يسعل و كلما يكبر تبدي تقل هذه الأمراض
💙 بحثك عن علاج يقوي المناعه يشبه جدا طالب كسول ما قرأ باليومي و اجه يريد براشيم يدخل بيها الامتحان
💙 المناعه تبنى بالأكل الصحي
الاكل الخالي من السكريات
الاكل القليل من الدهون
بالنوم الجيد
و التعرض للشمس
و الاهتمام بغسل اليدين
💙 موضوع انه الرشح مستمر ماله علاقه الموضوع بالمناعه و الدليل من تسافر خارج المدن المغلقه المكتظه و تروح لقرى او دول بيها نسبه نباتات اكثر تشوف انه الرشح بدا يقل لان الرشح هو وسيله دفاع لانفك ضد الغبار و التلوث
💙مناعة الطفل المولود بدائية جدا و جدا و جدا ذلك يعتمد في ال 3 شهور الاولي من حياته علي بروتينات وخلايا المناعة اللي اكتسبها من امه وهو في بطنها و الرضاعة الطبيعية
لذلك رضعي طبيعي
و تغذي صحي خلال الحمل و قبل الحمل
💙 ماكو اي دليل علمي على ان اي غذاء معتدل متنوع في العالم كله و في العراق خصوصا انه ناقص باي عنصر غذائي
💙 ماكو اي داعي انه تنطين لطفلك مقويات و انت تنطيه نستله و عصير و جبس
💙 المناعه تبنى بسنين و ايام و اكل صحي و نوم وفير مو بفيتامينات او مشهيات
د. سيف سمير البياتي اخصائي طب الاطفال
from د. سيف سمير البياتي