احجيلكم قصه
قصه قصيره مداها اسبوعين
لطفل مراهق اجه الاب يشتكي من وزنه القليل و طوله القصير
الطفل او خلي نكول الشاب
شاحب كبياض ورقه
هزيل
اكله ؟
جبس و اندومي و عصير
نوم ؟
ماكو نوم بس بوبجي
دزيته تحاليل للنمو :
فقر دم نسبه الدم 6.5 الطبيعي اكثر من ١١ و نصف
الحديد قريب الصفر
و مخزون الحديد 3 الطبيعي بين ٧ إلى ٧٠
ضفت حديد
و سحبنا الموبايل
و اكطع السهر
خلال اسبوعين
الطفل زاد كيلوين
و طول ٢ سنتيمتر
الموضوع بصراحه ما صدكته
رحت قسته بنفسي
نسبه الدم صعدت من ٦ إلى ٩ خلال اسبوعين
و راح ابقيه مراقبه و اشوفه كل ٣ أشهر
دا تشوف يا ابويه يا أمي شكد الجبس و العصير ظالم؟
دا تشوفين انه الاطفال اذا غداهم كله اندومي شراح يصير بيهم؟
فهمت القصه يا جدو و يا بيبي شكد العصير سيء ؟
و شكد النستله مضره
و الجكليته مو زينه ؟
هو شنو الاكل غير خير الله
و هي شنو المناعه غير نوم من وقت ؟
و الطول ما يتحصل اذا الطفل ما نايم قبل العشره و الله لان هرمون النمو يفرز ليلا عند النوم
دمتم بود
د. سيف سمير البياتي اخصائي طب الاطفال
from د. سيف سمير البياتي