الاطعمه اللي تتناولها الام و تزيد المغص !
مغص حديثي الولاده حاله تصيب الاطفال باعمار اقل من 3 أشهر
المغص هذا غير معروف الاسباب
بس بصراحه اني كلش شغوف بهذا الموضوع و اقرا عنه كثيرا
بهذا البوست راح اناقش دراسات مهمه ناقشت موضوع اكل الأم و كيف يأثر على المغص !
ياشهر دراسه عن الموضوع بسنه 2005
لكوا انه ابتعاد الأم عن الاطعمه المشهوره بأنه تسوي تحسس اختفت الاعراض نهائيا او جزئيا من 74 بالميه من الاطفال
بس شنو هذه الاطعمه ؟
الاطعمه هي كانت
الحليب البقري
البيض
الحنطه
الفستق
الصويا
السمك
هذه الاطعمه موجوده بكل وجباتنا و الابتعاد عنها لأول ٣ أشهر ممكن صعب على الأم
بس ناخذ المعلومه و نقرأها
الدراسه الثانيه شافت انه الأمهات اللي ياكلون اكلات معروفه انه تسوي غازات فان اطفالهم يعانون من المغص اكثر
و هذه الاطعمه هي
القرنبيط
البروكلي
اللهانه
وحده من النظريات تكول انه اللي مو صحي للأم اكيد مو صحي للطفل لذلك حاولي تتجنبين الاطعمه المصنعه
و بنفس الدراسه السابقه شافوا انه الشوكولاته ممكن تزيد المغص بس ممكن يكون الحليب اللي بالشوكولاته هو اللي يزيدها !!
لعد شناكل اذا كلشي ممنوع ؟
لا ابدا مو كلشي ممنوع
اشربي ماء اولا و الكثير من الماء
ثانيا اكلي خضروات هوايه بس تجنبي الخضراوات اللي تسوي غازات اللي ذكرناهن مسبقا
ثالثا الفواكه انت حره باختيارهن ولو اكو دراسه صغيره لكوا بيها ان العنب يقلل المغص مقابل الموز اللي ممكن يزيده
رابعا الحبوب الكامله عدا الحنطه
خامسا اللحوم بكل اصنافها
بوحده من الدراسات شافوا ان إعطاء الاطفال بروبايوتك يقلل المغص بصوره عجيبه
بالاخير نكول انه ماكو علاج شافي 100 بالميه للمغص
بس احنا و انت نحاول نقلل المغص
و نغير طعامنا او ما نغير طعامنا هذا قرار شخصي يخصك
فأنت تفعلين الأفضل باعطاء طفلك الرضاعه الطبيعيه اللي ما يشبهها و لا حليب صناعي
و بالاخير هذا المغص راح يمر
د. سيف سمير البياتي اخصائي طب الاطفال
from د. سيف سمير البياتي