مناعته ضعيفه !
و منو اللي ما كالت هذه الجمله لتصف حاله نشله اعتياديه مر بها طفلها الصغير نتيجه اختلاطه بالروضة!
و مناعته ضعيفه
تكولها كل ام و كل اب لأي حاله انفلونزا و اي حاله اسهال يمر بيها طفلها
و لان المعرفه كنز
و لأن الناس يجب أن تعرف منين يجي المرض
راح اكتب هذا البوست
خليك منفتح و وسع مداركك
يلا نبدي بسم الله
و صخن الطفل و انت راسا كلتي منين اجه المرض و هو كاعد بالبيت صارله يومين او شهرين أو سنتين و ما طالع من البيت
و الطفل ما يروح حضانه او روضه
و انت و ابوه مو مرضى و صحتكم زينه
و ما جايكم اي طفل خطار و لا طاب يمكم مريض
و اكو اطفال اجوكم بس ما كانوا مرضى
او طلعتوا للسوق بس بتباعد اجتماعي
المهم هو
منين اجه المرض !!!
❤ بعض الفايروسات تكون معديه خلال فتره حضانه المرض
حضانه المرض هي الفتره بين التقاط الفايروس و ظهور الاعراض
يعني مثلا
ابو محمد و محمد
محمد الطفل اليوم ارتفعت حرارته
بس ابو محمد ثاني يوم ارتفعت حرارته
هل محمد نقل العدوى لابو محمد ؟
منطقيا لا لان محمد بالبيت
بس ابو محمد نقل الفايروس لمحمد و بدت الاعراض عند الطفل قبل ما تظهر عند ابوه اللي هو اصلا عنده الفايروس
فقسم كبير من الأهل يكولون احنا انعدينا من الطفل
مثال حي جدري الماء يعدي قبل ظهور الحبوب بيومين
و فايروس كورونا يعدي قبل ظهور الاعراض بيوم او اثنين
❤ مثال اخر
طفل شفي تماما من المرض بس لسه يطرح الفايروس بالادرار او الخروج او التنفس
مثل فايروس الروتا اللي هو مسؤول عن الاسهال
و فايروس الهربس اللي ممكن يستمر لاسابيع طوال !
❤ سامعين باللي حامل للفايروس بس بدون اعراض ؟
تدرون انه من لطف رب العالمين مثلا ان 99 بالميه من حالات شلل الاطفال تصير بدون اعراض
و ان فايروس كورونا بدون اعراض في نصف الحالات !
و ان اغلب الأمراض تصيبنا بصوره صامته بدون اعراض
بس المصاب بلا أعراض ينقل المرض للاخرين و يصيبهم بالمرض
لهذا ممكن تشوفين اللي حولك من اطفال صحتهم ورد بس طفلك يتمرض لان هو عنده اعراض
و مره طفلك مثل الورد بس الطفل الاخر تمرض و هكذا
أشهر مرض هو الكورونا و الانفلونزا و الحمى الورديه فطفلك ممكن ترتفع حرارته بشده في حين ان الطفل اللي نقل العدوى لطفلك بدون اعراض !!!!!
❤ الطفل بالبيت بس انت و ابوه تداومون و تحتكون بالآخرين و تلمسون مكاتب و مكانات ممكن يكون عليها الفايروس حي و تنقلوه للطفل
زين احنا ليش ما تمرضنا؟
لان عندكم مناعه مسبقه
.
.
هسه ناخذ نفس و نعيد قراءه البوست
و نقرأ مصادر رصينه
و نفتح كوكل و نجيك شنو كاتب اني بهذا البوست الطويل
و بعد ما سوينا هذا كله
نترك جمله
مناعته ضعيفه
و جمله تمرض من الجو
و تمرض من السبلت
و تمرض لان غسلتله
و تمرض لان استبرد
و تمرض لان حر و برد
و نعرف جيدا ان كل امراض الاطفال عدوى
من الاسهال
و الرشح
و الانفلونزا
و التهاب اللوزتين
المعرفه كنز
و حلو الواحد يغير أفكاره ليصبح نسخه افضل
د. سيف سمير البياتي اخصائي طب الاطفال
from د. سيف سمير البياتي