احجيلكم شويه عن نظام الفطام الجديد القديم
اللي هو baby lead weaning
او طفلك يقود لفطامه
هذا يبدي بعمر ٦ اشهر و اكثر
من يبدي ياخذ كلشي و يوديه لفمه
شنو الخطوات :
١. انطي حليب ٣٠ إلى ٤٠ دقيقه قبل الوجبه المخطط الها حتى لا يكون الطفل كلش جوعان
٢. كعديه بكرسي منفصل او كرسي عالي ويه الاكل
٣. وفري اكل على شكل أصابع و يكون مو صلب و جدا سهل
٤. هسه اتركيه اي نعم اتركيه راح يبدي ياخذ بيده و يوديه لفمه
٥. ثقي بيه هو راح ياخذ اللي يحبه و يترك الباقي و يشبع
.
.
شنو محاسن هذه الطريقه؟
١. ما يحتاج اكل خاص و وقت ضائع علمود تحضير الشوربات
٢. لا خلط و لا خلاط و لا محضره طعام
٣. ما يحتاج جهد منك و لا من اي احد
٤. ممكن كل العائله تاكل بنفس الوقت و يكون جو ودي للكل
٥. ماكو انتقالات و ابني إلا ياكل اكل مهروس جدا
من البدايه ياكل اكل صلب نوعا ما
٦. لا يوجد ازعاجات انه اكل او ما اكل .. حب او ما حب نوعيه طعام راح يتوفرله قائمه طعام مفتوحه هو يختار منها
.
.
مساويء هذه الطريقه؟
١. الفوضى طبعا
نصف الطعام على الأرض و الباقي بالفم
٢. اكو أهل يكولون انه يسبب الاختناق دراسه ممتعه استراليه تكول طعام الاصابع مو خطر أكثر من الشوربات (الرابط بالتعليقات)
٣. كلام حجيه تسواهن و اعوانها انه انت عجوزيه و مخليه طفلك ياكل وحده و ما تريدين تسوين اكل
.
.
طيب دكتور ساعدنا احنا ما نريد نوكله من ال ٦ اشهر نريد من ٤ اشهر و اكيد شوربات فشوكت نحول على هذه الطريقه
يعني دكتور بين قوسين نريد نجمع بين الطريقتين؟
اي عادي ممكن تخلطين بين الطريقتين للفطام انه تنطين شوربات بالبدايه و بعدين تحولين على طعام الاصابع بعمر ٩ اشهر
د. سيف سمير البياتي
اخصائي طب الأطفال
