اعوجاج راس الطفل
اليوم البوست للامهات الجدد و الحوامل و اللي اطفالهم اقل من عمر السنه
اليوم هو عن كيفيه منع اعوجاج الراس بالنسبه للأطفال
اللي دا تصير كلش هوايه بعد حمله
النوم على الظهر اللي قللت نسبه وفيات الفجأه بنسبه عاليه جدا
المهم شنو هم الخطوات ال ٧ حتى راس طفلك يصير عدل ؟
١. وضع الطفل على بطنه من يكعد
اكيد لازم يكعد من النوم
و اكيد انت كاعده و لا غافيه و لا نعسانه
اصلا هي نومه طفلك على بطنه تقوي عضلات البطن و الكتف
بس ارجع و اكرر
النومه على البطن انت و طفلك كاعدين و بمراقبتك
لا يروح يغص و يروح بيها
ابدي بيها شويه شويه
من دقيقتين إلى ٥ دقايق
و طوليها إلى ثلث ساعه
٢. غيري الجهه اللي ينام عليها باستمرار مره يمين مره يسار و هكذا
احنا كلنا انه النومه على الظهر بس هم مره فري راسه يمين
مره فري راسه يسار
٣. شيلي طفلك و لعبيه من يكعد من النوم
تكدرين تستخدمين حماله الطفل حتى تتحركين و تادين واجباتك البيتيه
طبعا موجود بوست عن هذا الموضوع بالصفحه
٤. غيري مكان الاضاءه!!!
اي و الله تخيلي
الأطفال يخلون راسهم بالاتجاه اللي بيه ضوء و يميلون عليه و يرفضون يغيرون بغير اتجاه
استخدمي التيبل لامب
و خليه بالمكان اللي تردين راسه يوجهه عليه
٥. العبي ويه طفلك و انطيه الأشياء من هو نايم على الجهه اللي ما يفضلها
يعني شون؟
يعني هو يحب ينام وراسه على اليمين فأنت تعالي احجي وياه من اليسار
انطيه العابه من اليسار و هكذا
٦. غيري مكان و طريقه الرضاعه سواء طبيعي او صناعي
و هذه نقطه سهله و راح تشوفين الصوره تسهلك هاي النقطه
٧. غيري مكانات النوم مالته مثلا مره بالسرير مالته
مره بالعربه مال النوم
مره بحضنك
و حتى ترتيب الفراش اللي تحت راسه هم غيريه
حتى راسه ما يتاثر بنفس الزوايا مال النوم
لاحظتي اني ما جبت طاري مخده؟
اي نعم لان ما يحتاج مخده تحت سنه و وجودها خطر تحت السنه لان ممكن يغص بيها و يختنك
و كل الود الكم
د. سيف سمير البياتي
اخصائي طب الأطفال
