#التربية
#الام
لاتعصبين. 🚫😡
لاتصيحين.🚫🤬
لاتضربين. 🚫✋
هل هذا واقعي؟🤔
الامومه مهمه صعبة وشاقه.. وتتطلب الكثير من المهارات حتى نقوم بها بشكل جيد..
فكره الام الي “دائما” ريلاكس ومتصيح ومتتعصب تره ماكو هيج!
واذا وجد فهي ام لطفل واحد👶 .. مع الكثير من المعاونه 👍
الحل ليس كبت مشاعر الام ..👎
الحل هو التعامل معها ..🙏
اكو فرق بين المشاعر الي تحس بيها وبين التعبير المتطرف
التعبير المتطرف يصير “احيانا” من الام تفقد وميبقى عقل برأسها.. أو بسبب عدم قدرتها على اداره الغضب
حاليا احنا مو بصدد معالجات نفسيه وطرق السيطره على الغضب ..
حنتكلم عن الام الطبيعيه الي ماتشكو من مشاكل نفسيه لكن مضغووووووطه 🗜️
وبالتالي تفرغ ضغطها على الأطفال .. 🤯
صح او غلط هذا واقع حال كافي إنكار !✋
وكافي اسلوب الوعظ الي مابي فائده مجرد الام تحبط وتحس نفسها مقصره ومقصره ..👎
◀️من تشكي يكلولها يمعودة حمدي ربج غيرج يتمنى اظفر طفل..🙄
◀️أو شدعواكم مو خلفنا قبلكم ١٠ وماشكينا!😏
ويتناسون قبل جان اكو ١٦ شخص بالبيت متعاون .
وووو الكثير من النصائح الي ٧٠٪ منها مجرد حجي ومابي اي فائده
نرجع للواقع ..
اكو رسائل ✉️ دتوصل على الخاص من عوائل ل٣ اطفال وأكثر ..
الام تكول بيها وبكامل قوتها العقليه: (اكرررره اطفالي)!
دتتخيلون حجم الكارثه؟
الام الي هي مخلوق الرحمه وأكثر شخص يحن على أطفاله دتوصل مرحله متطيق أطفالها ..
رجاءا رجاءا
اتمنى هذا البوست ينتشر ويعمم
الاب 👨
وينك .. مرحبا .. اهلا ✋
انت تعبان وشغل ولود وووو
بس تره مسؤوليه زوجتك بالبيت اضعااااف
اغلبنا موظفات وشايفين الدوام
و اكو نساء تشتغل اعمال حره ووو يعني الشغل برة البيت مجربي كلش زين وماكو مقارنه بين شغل برة البيت وشغل بالبيت مع الاطفال حصرا.. شكد مايصير شغل بره البيت يجي وقت نرتاح منه .. (عطله.. نهايه دوام..اوف.. إجازة .. ووو)
هذا الكلام لايعني أن نغير الحقائق ولا نبدل الأدوار
كل الي نريده تفهم وتفهم ومساعده صغيره جدا تسوي فرق شاسع
شنو هاي المساعده؟
انت اختار حسب وضعك وحسب قدرتك
زوجتك محتاجه راحه صغيره جدا تخليها تكدر تواصل وي الاطفال بكل حب وموده
1️⃣ساعة يوميا تكعد انت مع الاطفال وتخليها هي براحتها .. تريد تنام 😴 تريد تقرا 📖تريد تسبح 🛀.. انطوها حريه
2️⃣ متكدر يوميا ومشغول فل .. فرغ يوم واحد بالاسبوع📅 او نص يوم اخذ الاطفال وياك واطلع …أو وديهم يم اهلك او أهلها أو اي احد تثقون بي وانطي زوجتك مجال راحه أو اطلع وياها وغيروا جو
3️⃣متكدر لا هاي ولا هاي اتفق وي امك او اختك 👵👱♀️ او اي معينه تجي للبيت سواء اسبوعيا مره او يوميا ساعة🕓
4️⃣ماعندك فلوس 💸 ومالك مزاج انطي مجال لزوجتك تسوي اتفاق وي صديقاتها أو اخواتها أو قريباتها يقسمون الايام بيناتهم وحده بيهم تعتني بالأطفال والبقيه ياخذون استراحه وتداول هاي الايام بيناتهم .
5️⃣كل هاي مامتوفرة .. اكو حل أيضا سحري الي هو الكلمه الطيبه والتقدير.. 🤗
يعني كول لها الله يساعدج .. لوما انتي جان شصار بحالنا
الله يخليج النا وميحرمنا منج ومن جهودج💞
عاشت ايدج الطبخ يجنن 😍 والبيت مريح بوجودج🥰 ووجود الاطفال 👶
الحياة بلياج صعبه 💛
جهودج واضحه على الأطفال ما شاء الله .. الله يجازيج كل خير على تعبج💘
بدل ما تجي تسم بدنها بعبارة (ليش تعبانه ليش شجنتي تسوين 😏) 👊🤬
هذا الكلام مو رفاهيه ولا تفلسف ..
هاي ضمن الامانه..
امانه تربيه اطفالكم 👶👶
مدام جبتوهم للدنيا لازم تحسنون تربيتهم
التربيه مع كميه ضغوط وتعب محتصير تربيه ..
الطفل مع ام متعبه ومنهكه 😩 و(شبعانه ملامه وانتقاد) محيحصل اي شي من حقوقه ..🚫
يحصل فقط الصراخ والتوبيخ 😡
حيطلع جيل ملئ بالعقد النفسيه والعاهات 😞😔
ارجوكم ارحمونا .. وارحموا اطفالكم 🤗
هذا الجيل حيكبر..وابنك حيتزوج.. وبنتك حتتزوج.. 👰💍
اذا بقى الحال هيج ٨٠٪ حيرتبطون بشخص عنده مرض نفسي ..
ترضاها على بنتك تأخذ واحد يكفخ بيها وميقدرها؟🤕 ترضيها على ابنج يأخذ وحده مخبله متسمعه كلمه طيبه وبس انتقاااد انتقاااد انتقاد؟😐
خلونا نصحى شويه ونسوي الي علينا لخاطر الجيل القادم ..
تدرون الي ديصير شنو؟ 🤔
الام 👩🦰دتتهرب من هذا التعب بالاستعانة بالتلفزيون والتاب والموبايل .. 📱📺📳
احنا مو ضد استخدام الاجهزه الذكيه..
لكن ضد اكيد الاستخدام المفرط والاستخدام العشوائي ..
ونزلت بوست شرحت أدق التفاصيل شلون تتعاملون مع التلفزيون والطفل وحسب الفئات العمرية المختلفة
الواقع ديكول قله قليله جدا جدا الي ملتزمين بالضوابط .. والسبب الام تكول ما اكدر اسيطر عليهم وحدي ! 🤷
وهذا صحيح وواقعي 🙍
والنتيجه الاطفال ديطلعون بأمراض وعلل وتأخر نمو وتأخر كلام وتأخر تعبير وإدراك .. 😣
يعني طفل بعمر ٤ أو ٥ سنوات ميحجي ! وبس يأشر!☹️
تجي الاب 👨 تشوف ابنك صاير بحاله هيج وتبدي النصائح ودي فلان مركز وفلان طبيب 👨⚕️وسفره بره وووو وتذب مبلغ من هذا الزين ولو يتعالج ويصير زين لو لا ويبقى الولد فاقد قدراته ! 😔
خوب من البداية يامسهلها
رتبوا وضعكم وتعاونوا
ودرهم 💰وقايه خير من قنطار علاج
وتذكروا هاي فتره مؤقته تأخذ حوالي اول ٣ سنوات من حياة الطفل .. وبعدها حيبدي الطفل يستقل كثيرا وحيل يقل الضغط ..👍
هاي في حال مشيتوا صح.. ✔️ والطفل كبر بشكل طبيعي وصحي ..
أما إذا كله خرابيط بخرابيط يلحك يصير عمره ١٠ سنين وامه توكله وتشطفه وتسبحه وتاتي تواتي 🤦
اتمنى وصلت الرساله 💌
ويارب اسمع قريبا الفرق الحاصل من تطبيق جزء من هذا الكلام ..
ختاما .. الأمهات الي متحملين كل الضغط وحدهم..
وكدروا يسيطرون على أعصابهم ٨٠٪ من الوقت ..
وكدروا يطلعون اطفال اصحاء سعيدين . انتن عظيمات 😍
وافتخرن بانفسكن وبانجازكن ..
انتي ساهمتي بنمو انسسان سيكون له بصمه على هذا الكوكب باذن الله ..
واخلصن النيه لله تعالى 💞
والجنة تحت أقدامكن 🤗
مودتي 🌷
د.اسماء إسماعيل البدري
