#لاتبچي!
الجزء الثاني
#سيكولوجية_بكاء_الاطفال
أما بوست
#هو_فرعون_منو_فرعنه
حينزل بعد هذا الجزء
لان شفت من الضروري شرح سيكولوجية بكاء الطفل لتكتمل لديكم الصوره ..
⚠️تحذير⚠️
بوست طويل ..
وجميل جدا جدا ❤️
الطفل ميصرخ راسا.. 🤚
الطفل يتكلم مع المربي بالبكاء على شكل متدرج..
واذا لم يحصل استجابه سيصرخ باعلى صوته
يعني شنو؟ 🙁
طفل عمره ٣ أو ٤ اشهر
كعد من النوم جوعان حيبدي يطلع اصوات نيه..نه..ننني..
اذا استجابت الام هنا .. انتهى الموضوع وسكت 👍
اذا مستجابت 🛑
حيرفع صوته ويزيد الوتيره
تصير نييي نييييه اهيييي اهيييي 😩
وكذلك اذا استجابت انتهى
اذا مستجابت🛑
حيبدي يصرخ ويملخ نفسه
وااااااااااااا وااااااااااااا واااااااااااااااااه 😭 ويزعل فعليا وقد يرفض الرضاعة إلى أن ترضي الام .
ليش هيج؟ وشكاعد يصير يم الطفل؟ 🧐
💡الي يصير هو كاعد يتكلم ويانا بلغتة..
لغتة الاصوات والبكاء😭
⏪اول مبدأ يطلع صوت كال اني جوعان..
وبهدوء بدون صراخ
⏪بعدين صعد الوتيره وكال
ولكم وينكم مو كلت اني جوعان .. بطني بلشت تكرصني من الجوع.. 😣
لكن محد اجى☹️
⏪هنا كام يعيط بقوه ويصرخ وترتفع هرمونات التوتر (ادرينالين وكورتزول)
وكام يكول ليش هيج محد ديسمعني !
مو كلت اني جوعان وكلش جعت هسه..! معقوله محد يسمعني! 🙁
معقوله اني وحيد؟😨
خاف اني محد يدري بيه.. يجوز اني مموجود ..😰
شلون اثبت انه اني موجود؟ 😱
وي كل هاي المشاعر نشوفه يكوم يبجي بحرقه وأنين و”فعليا مقهور” 😔
لان ديحس محد بحاله .. ودخل الشك لشخصه👎
💢وطبعا قد يستغرب البعض لكن الطفل تبدي وياه الثقه من اول سنه من حياته..
اذا حس أنه محد مهتم بي .. وأنه وحيد.. وأنه يصرخ مرارا وتكرارا يلا يكدر يحصل الرعايه الاوليه (رضاعة . تجشأ. تبديل حفاظ.شعور بالاهتمام) 🚫
حيخلي عنده تصور أنه العالم والمحيطين بي غير جديرين بالثقه ..
لان يحتاج أن يتوسل ويصرخ بقوه يلا يحصل مطالبه البسيطه..😐
دكتوره دخيلج شنو هالحجي مو عبالك بالغتي؟ 😑
لا ابد ابدا
انطيج ياها من الاخير .. عندج طفل عمره دون السنه
#لتعوفي_يبجي_وحده ابد ابد ابد
الا في ظروف قاهره وخارج ارادتج
⚠️نظريه عوفي خل يبجي ..
ونظريه تكبر رئته..
وعوفي لايتعود
كلهن ذبيهن بالزبل 🗑️(وانتوا بكرامه)
طفل دون السنه لغته وياج هو البكاء .. 😭
إهماله حيسبب مشاكل وياج كلش هواي..
شنو هاي المشاكل ؟ 🧐
١. فقدان الثقه
٢.استخدام الصراخ والبكاء الشديد بدل الكلام
٣. فقدان القدره على التعبير
٤.تاخر النمو والإدراك إلى حد التخلف العقلي والأمراض النفسية الشديده
٥.حساسية الطفل الشديده (كلساع يبجي)
يمعوده دكتوره شسالفه ! 🙄
والله مكاعد اتشاقى وهسه اشرحلكم وحده وحده 👍
1️⃣اولا: فقدان الثقه : شرحتها فوك 👆
2️⃣ثانيا: استخدام الصراخ والبكاء بدل الكلام.. ليش؟
لان انتي عملتي هيج..
حجى وياج بهدوء اول مره وكال ماما جوعان بلغته (نيه نيه) بس انتي لبستي 😐
اضطر يستخدم البكاء والصراخ وشاف جاب نتيحه واجيتي عليه ورضعتي .. !
مره ثانيه كرر هاي التجربه وحصل نفس النتيجه😅
وثالثه ورابعه وعاشره..
وصل لاستنتاج الي هو
(الكلام “بكاء بصوت منخفض” = اهمال)
(الصراخ والبكاء الشديد = الانتباه وتحقيق المطلب) 😑
إذن يلغي فقره الكلام لان مابيها نتيجه ويعتمد الصراخ .. لان هي بيها تحقيق المطلب . ويصير طبع وعاده
ومن يكبر لازم ترجعين من صفر 0️⃣ تدربي يبطل هاي العاده ثم تبدين وياه زرع عادة صحيحه.♻️
3️⃣ثالثا:فقدان القدره على التعبير 🤐
اصحاب نظريه “لتعودي”
احجيلكم قصه أو قصتين
الاولى: يكلج اكو طفل 👶 حديث ولادة امه ترعى وتهتم بي
وحاله حال كل الأطفال كعد من النوم وبلش يبجي ..
جتي امه شالته ورضعتة ورجعته لفراشه بس رجع يبجي.. رجعت شالتة ..
نبصت مناك عمتها مدري خالتها مدري جيرانها مدري صديقه الخياطه الي خيطت بدلت العرس وكالت لها بناءا على خبرتها العريقه بتربيه ١٣ طفل :
_لاااااا ديري باااالج لاتشيييلي 😱
_ليش؟ 😳
_حتى ليتعود ويكسر ظهرج يمعوده😏
_مو ديبجي خطيه😥
_دعوفي يمعوده يبجي مره مرتين ويبطل 😏
صفنت هنا حسنيه وكالت يلا جاسمية افهم مني خل اعوفه احسن . 🙄
رجعته للفراش وبلش يصرخ ويعيط 😭
وهي مغلسه 🙃
وتكرر هذا المشد
مرتين وثلاثه وعشره وعشرين
والنتيجه وحده
وراها اشو صدك بطل بعد ميبجي!😳
يا صدك طلعت تفتهم جاسميه! 😆
الي صار شنو؟🤔
الطفل ظل يكول لامه ماما تعاي شيليني
ماما اني خايف
ماما اني ضايج
ماما اني وحدي
وووو
لكن بدون اي فائده.
آلى أن تعب ومل واستسلم
لان وصل لنتيجه وحده ..
تتكرر بكل مره
كل ما ابحي واصرخ واحجي محد يجي يشيلني..
بس اتعب من البجي ..
خلاص بعد ما احجي ولا ابجي لان ماكو اي فائده👎
وهنا وصل إلى ” أنه هو غير مسموع” و”غير مهم”
ومن يكبر حتترسخ هاي الفكره برأسه..
ونشوفه نادرا يبدي برئيه ونادرا يحجي ويبادر ويسولف.. ليش؟
لان يحس هو مو مهم وماله داعي يحجي عن نفسه .
وفقد القدره على التعبير 🤐
الثانية: على نفس الشاكله طريقه تدريب الطفل على النوم باستخدام طريقه “cry out”
يكلج عوفي الطفل ابو ٤ لو ٥ اشهر يبجي لحد ما ينام ولاتدخلين.. مره على مره بعد ميبجي وكبل ينام😏
وهو صحيح فعلا حيبطل لان مل ولعبت نفسه كد مايكول ما احب انام وحدي وإني خايف واريد ماما بس محد سمعله.. والنتيجه … نام بوحده مقابل فقد القدره على التعبير.. وحيتاج جهد من يكبر يلا يتجاوز هذا الخلل
4️⃣رابعا : تأخر النمو
“عندما يبكي الطفل لساعات فهناك حقيقة ان أجسادهم الصغيره وعقولهم تكون مغمورة بهرمونات التوتر؛ الأدرينالين والكورتيزول و عندما يتعرض نسيج المخ و هو في مرحلة التطور لهذه الهرمونات لفترات طويلة ، فإن هذه الأعصاب لن تشكل وصلات مع الأعصاب الأخرى، و سوف تضمر ”
هذا اقتباس علمي 👆
يحتاج شرح بعد؟
اتوقع واضح
من تضمر الأعصاب ويضمر المخ يتأخر النمو.. يعني يتأخر مايمشي..مايحجي.. ما يتفاعل. يصير ابله
اضافه الى المشاكل النفسيه..
شايفين فلم الجوكر؟ 🤡
مرضه صار لانه عاش طفوله مهمله .. والي يريد تفاصيل يرجع يشوف الفلم
5️⃣خامسا: يصير حساس بزيادة
الحساسيه الزائدة من أحد أسبابها هو تأخر النمو والقدرات
يعني طفل بعمر المشي بس بعده مايمشي.. صار عنده تأخر. أو بعمر مفروض يحجي بس بعده ميحجي..
نشوفه كلساع يبجي كلساع يتنعوص
بسبب أنه يحس نفسه شبه عاجز .. عاجز عن التعبير.. عن الحركه الطبيعية..
زين دكتوره تره دخنا هسه شنسوي؟😥
ارجع اكلج الملخص ..
#طفلك_دون_عمر_السنة_لاتخلي_يبچي_وحده
ابدا ابدا ابدا
⁉️زين مو ما الحك😐
📩خلي هو أولى اولياتج .. هو اولا ثم الباقي
⁉️زين دكتوره عنده غازات شما اسوي يظل يبجي😥
📩طولي بالج وحافظي على هدوء اعصابج قدر الامكان وحضنج اله واغنيه صغيره ومساج حلو وحملة على صدرج كفيل جدا أنه يشعره أنه انتي مهتمه بي وتحبي ومقدره المه🥰
حتى لو استمر بالبكاء.. محتصير مشكله مدام مقابلتي بالاهمال👍
⁉️زين دكتوره اني كلش تعبانه ما اكدر .. اذا اشيله يمكن اشمره من التعب وكآبة مابعد الولادة
📩هنا ستووووب stop✋🛑
لاتتقربين على الطفل اذا ماعندج قدره تلزمين اعصابج..
تتركي يبجي “تحت هذا الظرف (مؤقتا) ” افضل بكثير مما تسببين عاههه مستدامه من خلال صفعه أو هزه بقوه
وتركه للبكاء ومغادره المكان لدقائق⏲️ والعوده افضل بكثير من حمله والصراخ بوجهه ..
🎟️وتذكري .. اطلبي المساعده بهذا الوقت الحرج..
طفلج ميستحق معامله سيئه..
وانتي متستحقين تعيشين كل هذا الإرهاق لوحدج..✋
⁉️زين دكتورة عندي توم\ اكثر من طفل هذا حجي شبه مستحيل ما اكدر علطول البي النداء 🙄
📩عزيزتي هذا الضرر الي يترتب نتيجة ترك طفل دون السنه يبجي، ميصير لان عفتي مره لو مرتين باليوم نتيجه انشغالج باخوه “لفتره محدوده”
ما اتوقع حتظلين مشغوله لما يفحط بجي فد ساعه
الانشغال الوقتي ضمن المعقول ..
هاي الاضرار تصير نتيجه اهمااال مقصود وعلى طوول
اكو عوائل تعوف اطفال حديثي الولادة حرفيا يبجون بالساعات وعلى مدى شهوووور.. تحت ذريعة (ما اريد اعودة)
المعلومات هاي دسمه واتوقع غير مطروحه كفاية..
اكمل الجزء الثالث
وان شاء الله ارجع افصلها ببوستات صغيره لتكون بمتناول الجميع
تحت هاشتاك
#طفلك_دون_عمر_السنة_لاتخلي_يبچي_وحده
مودتي 🌷
د.اسماء البدري