الحمل بالاطفال هل يعني فقدان الكالسيوم من اسنان الام؟!🧐
هذا معتقد كان ومازال رائج بين مجتمع الامهات مثله مثل معتقد ثاني انه اسنان الام تتفتت مثل الطباشير بسبب انه الطفل يسحب الكالسيوم من اسنانها!😢🥺
على الرغم من انه هالمعتقدين خاطئين ومالهم اي اساس من الصحة…لكن هواية نسمع امهات تشتكي من اسنانها وتكول” ويه كل طفل افقد سن” او ” خربت اسناني اثناء فترة الحمل والرضاعة”🤷
🧏خل نجي نعرف الحقائق وراء هاي المعتقدات… بس بالبداية لازم نعرف انة الكالسيوم الي موجود باسنانة على خلاف الكالسيوم الي موجود بالعظام الي ممكن يتحول باي مكان بالجسم محتاجه, الكالسيوم الي موجود باسنانه مايروح لاي مكان ثاني.
اذا كان اكو نقص بالكالسيوم بتغذية الام خلال فترة الحمل, عظام الام هي الي حتوفر هذا الكالسيوم , للدم والعضلات وللطفل بس مو اسنانها.
زين لعد شون ياثر الحمل على اسنان الام؟ وليش قسم فقدوا اسنانهم خلال فترة الحمل؟🤓
جسم الام خلال فترة الحمل راح يتعرض لتغيرات تاثر على صحة فمها واسنانها واهم هاي الشغلات:
1. بعد نوبات لعبان النفس والاستفراغ الصباحيه (وبعض الاحيان تستمر طول اليوم) راح تاثر احماض المعدة الي تصعد خلال الاسترجاع على مينا الاسنان وممكن تسبب بتاكل طبقة المينا.
2. التغيير بالعادات الغذائية خلال فترة الحمل, زيادة السكريات خصوصا ممكن يسبب تسوس الاسنان.
3. امراض اللثة الي تزداد بفترة الحمل بسبب زيادة مستويات الهرمونات بجسم الام والي تؤدي الى التهابات وامراض اللثة.
بعد الولادة حتتغير حياة الام جذريا وية الوضع الجديد قله النوم تغير بالعادات الغذائية وحتى بستايل الحياة, هواية امهات يهملون نظافة الفم والاسنان بسبب انشغالهم برعاية الطفل… بالاضافة لتغير عاداتهم الغذائية, اكل موصحي او زيادة عدد الوجبات, استهلاك للسكريات عالي…الخ هاية كلها راح تاثر على صحة الفم والاسنان عند الامهات.
ولهذا لازم ننصح الحوامل بالنقاط التالية:
💡 اذا كانت الحامل تعاني من استفراغ متكرر, معناها انه الاحماض المعدية دتصعد للفم وراح تسبب وسط حامضي بالفم وهذا معناه نمو اكثر للبكتريا, تراكم لطبقة الجير (البلاك), وتاكل لطبقة المينا , بهالحاله الحامل تحتاج انه ✅.تتمضمض بماء بعد الاستفراغ, اذا تكدر تستخدم غسول فم يحتوي على الفلورايد الي راح يعادل الحموضة بالفم ويقوي مينا الاسنان , يكون احسن
✅ ننصحها تاخذ علكة خالية من السكر راح تقلل من لعبان النفس وتعادل الحموضة بالفم.
✅ تاجل تفريش الاسنان بعد الاستفراغ ساعة الى ساعتين , لان الاسنان راح تكون عرضة للتاكل اذا فركناها مباشرة بعد تعرضها للاحماض.
✅ ننصح الحامل بغذاء صحي متوازن, مع تقليل السكريات شكد مانكدر, لان الاكل خلال اليوم بين وجبات رئيسية وسناك راح تكون الاسنان اكثر عرضة للتسوس.
✅ غسل الاسنان مرتين يوميا بالطريقة الصحيحة لمدة دقيقتين وتنظيف مابين الاسنان بخيط الاسنان مرة واحدة يوميا.
✅ المراجعة الدورية لطبيب الاسنان للكشف عن مشاكل الاسنان واللثة من قبل الحمل وحتى اثناء فترةالحمل وعلاجها مباشرة قبل تفاقم المشكلة.
تمنياتي لجميع الامهات بالصحة والعافية
تحياتي
د.همسة الدهان
#همسة_الدهان
#الاهتمام_بالاسنان_خلال_فترة_الحمل
المصدر باول تعليق…واذا حبيتوا المعلومات شاركوا المنشور مع اصدقائكم واهلكم وكل ام مقبله عالحمل…..😀
from د. سيف سمير البياتي