السعال و الرشح مقابل الانفلونزا
⭕السعال و الرشح اللي نسميه عراقيا بالنشله او البرد
يصير نتيجه التعرض لفايروس اسمه راينو فايروس في اغلب الحالات
فايروسات اخرى ممكن تسويه مثل الكورونا بس مو الكوفيد اللي منتشر حاليا
فايروس اسمه الادينو هم يسويه
الانفلونزا يسويه فايروس اسمه الانفلونزا او البارانفلونزا
و بيها فصائل هوايه مثل H1N1 و H3N2 و غيرها
⭕النشله اعراضها خفيفه و بيها العرض البارز هو سيلان الانف و العطاس و صداع خفيف و حراره ممكن تكون خفيفه جدا او متوسطه و اغلب الحالات ما يكون بيها حراره و تطول اسبوع الى اسبوعين و تروح
الانفلونزا اعراضها حراره و حرقه بلعوم و صداع و رشح قليل او ماكو رشح و وجع عضلات و مفاصل شديده و احيانا اسهال و قيء
و هم تاخذ 10 ايام الى 14 يوم و تروح و تختلف الشده على حسب نوعيه الفايروس و المقاومه و العمر
⭕ النشله مالها لقاح و من العادي انه الطفل يصاب بالنشله ٦ الى ٧ مرات سنويا و حتى لو 12 مره بالسنه هم طبيعي
الانفلونزا الها لقاح بس نسبه نجاحه بمنع الانفلونزا هي 50 بالميه النسبه اللي نامل انه لقاح الكورونا يحققها حتى نمنع الكورونا و اذا اكثر بعد احسن بس بعد ننتظر و نشوف
⭕ النشله مضاعفاتها التهاب الاذن
الانفلونزا مضاعفاتها ذات الرئه
⭕ النشله علاجها بسيط مجرد خافض حراره و تنظيف انف و اذا الطفل عمره اكثر من سنه عسل
الانفلونزا الها علاجات و هم فعاليه هذه العلاجات نكدر نكول عليها بين بين مثل علاجات الكورونا الحالية مثل الريمدسفير الامريكي و الافافير الروسي اللي هي بين بين
يعني مو مثل البكتريا اللي علاجها بالمضاد الحيوي واضحه و تقلل نسبه الوفيات و
بس باغلب الحالات الانفلونزا علاجها خافض حراره و تنظيف الأنف و الكثير من السوائل و الراحه
هذا الفرق بين الاثنين
كورونا اللي منتشر حاليا مشكلته انه يحب الرئه فتشوفه يفضل الرئه و اصاباته راسا بالرئه اللي نعتمد عليها بالتنفس لذلك نخاف اكثر من هذا الفايروس الجديد
د. سيف سمير البياتي اخصائي طب الاطفال
