النظام الغذائي لأكل الاطفال بعمر اقل من سنه
هذا البوست طويل و يحتاج إلى كوب قهوه صغير و تسمعين ام كلثوم و تقريه و ركزي ويايه
نبدي بالاساس؟ .
يلا نبلش
❤ هو شوكت ادخل الاكل للطفل ؟
علامات الاستعداد للأكل تبدي باي وقت بين ٤ أشهر و ٦ أشهر
منظمه الصحه العالميه تكول ٦ أشهر
بس العديد من المؤسسات الصحيه تكول انه باي عمر بين ٤ و ٦ أشهر
❤ طيب شنو علامات الاستعداد
اولا مضاعفه وزن الولاده يعني اللي وزنه كلن ٣ و نص صار وزنه ٧
ثانيا مصلب راسه و ما يميل لا يمين و لا يسار
ثالثها عنده رغبه بالأكل و تعرفيها ببساطه من تمدين الملعقة لفمه و يريد ياخذها و ياكلها
❤ قوام الاكل شونه؟
قوام الاكل لازم يكون خفيف مثل الحليب اللي يشربه خفيف جدا و ياريت لو مخلوط بحليبك او حليبه الصناعي
❤ و شون ابدي الاكل ؟
ابدي بملعقة او ٢ من شوربه الرز اللي محضرتها منزليا مثلا مو بالفوح و إنما شوربه رز و تخلط جيدا بالمحضره
و أخلي الطفل بحضني او بكرسي الطعام
و ابدي اكوله يلا حبيبي ناكل
و يلا هم يا أسد
و الأسد شون ياكل
و أخلي ملعقه بيده اذا يكدر حتى يتعلم
❤ و شنو اتوقع يصير ؟
عادي نصه يرجعه عليك
و اللي يدخل لبلعومه يدخل
و الباقي يوصل لشعره و خشمه و حتى داخل الحفاظ تلكيه
اكو رأي آخر انه تبدين الوجبه برضعه بسيطه و تكملين الاكل بملعقة وراها تنهين الوجبه برضعه
❤ دكتور و ليش ما انطيه الاكل بالمميه؟
ما يفيد و لا راح يتعلم
الغرض من هذا البوست و هذه الطريقه هو أن يتعلم الطفل كيف ينتقل للأكل الصلب و الا ما سوينا شي من خلينا تشريب الباميه بالمميه
❤ و شنو رايك ابدي ببيوريه الجزر ؟
و اني اعارضك مثلا
بالعكس اني معك
ابدي بالجزر او الرز او الشوفان او الشجر او البطاطا او اللحم او الدجاج
اني و كل مؤسسات الدنيا تكول ما راح يفرق كلش بشنو بديتي
بس لا تبدين خطأ بأكل بيه سكر او ملح
❤ يصير انطيه فواكه ؟
اي ليش لا
بس نخلص الخضراوات اول
❤ يصير انطيه عصير برتقال؟
لا
الجمعيه الامريكيه لطب الأطفال خصمت الموضوع و كالت العصير ممنوع تحت عمر سنه و الغايه لاستفاده الطفل من الألياف
❤ انطيه لحم ؟
يا ريت و تبقين مثقفه جدا و تعرفين معلومه مهمه انه الطفل بعمر ٤ إلى ٦ أشهر بعز احتياجه للحديد
❤ الخبز و البسكت شوكت؟
البسكت صفر قيمه غذائيه فنتركه
و الحنطه و البيض و اللبن افضل تتاجل بعد ٦ أشهر
❤ شنو رايك بالسيريلاك؟
لا تبدين خطأ توا كلتلك
خطأ انه نبدي بشي حلو
انطي سيريلاك بس مو هسه لا تستعجلين يعني وره شهرين من ادخال الاكل ممكن و اذا ما انطيتيه بعد احسن و شاطره و نادره انت
❤ أكدر اخلط رز و جزر ؟
اي طبعا ممكن بعد ما تجربين كل وجبه على حده و ضيفي عليهم من حليبك
❤ كل وجبه شكد استمر عليها ؟
٣ إلى ٥ ايام و ننتقل للوجبه الاخرى
❤ شنو اتوقع من تغييرات ؟
امساك او اسهال
اذا طلع مخاط بالخروج معناها انت مستعجله نبطيء ادخال الاكل
❤ اللحم يسوي دود ؟
طبعا جذب و ماله اي علاقه و كلش متخلف هذا المبدا عيب احنا ب 2021 و ما نعرف ان الدود عدوى
❤ و اذا صار عند الطفل تحسس شنو اسوي؟
وقفي الوجبه و بس
❤ ماكو طريقه امنع التحسس او ااجل الاكل ؟
ماكو طريقه و لا اكو اي توصيه رصينه بان تاجيل الاكل راح يحمي من التحسس
٠❤ الممنوع قبل السنه شنو ؟
العسل
العصير
السكر
الملح
الدهون المشبعه
و اي شي ممكن يسبب خطر الاختناق
❤ شوكت ابدي أخلي الاكل بيده ؟
بعمر ٦ إلى ٧ أشهر مثل اصبع بطاطا او خيار او خبز منقع بحليبه او معكرونه
❤ تحذيرات معينه ؟
البرتقال و الطماطه و اللالنكي و الفراوله و الكيوي ممكن تزيد الاصابه بطفح الحفاظ
❤ متى ابدي اثخن القوام ؟
من الشهر السادس
❤ توصيات أخرى؟
العادات الجيده تبدأ مبكرا
ياكل وياكم
و يشرب وياكم
و ممنوع التلفزيون و التكلم أثناء المائده
وقت ثابت للوجبات و مرتب
ماكو غصب
ماكو جبر
ماكو تعصيب
و نقلل الحليب
و نصعد تدريجيا
و بلا توتر
و بلا ضرب
و الأمور راح تمشي تمام
لا تنسون ان الصفحه بعدها تحت الحظر لذلك ما تظهرلكم
د. سيف سمير البياتي اخصائي طب الاطفال
from د. سيف سمير البياتي