اليوم لكيت وحده من التعليقات في احد الصفحات تنتقدني
اكيد اني خوما معصوم
بس المشكله راح اجمعلكم شنو النقاط اللي منتقدتني عليها !!
1. استخدام النستاكورت لفتره طويله :
اني محذر من استخدام النستاكورت لفتره طويله بسبب قابليه جلد الطفل على امتصاص النستاكورت و بالتالي ظهور اعراض جانبيه مثل الضغط و السكري و حصى الكليه و ضمور الغده الكظريه و هشاشه العظام
الاخت تكول :
كل جهالنا نخليهم و ما بيهم شي
في حين اني شايف مئات الاطفال بيهم شي !!
2. تنتقد الاخت في تعليقها اللطيف انه اني كلت المفروض ٨ مميات للي تريد ترضع صناعي
في حين هذه توصيه عالميه حتى تتعقم المميات مره واحده و تنطي للطفل كل مره بمميه مفوره
3. تنتقد انه اني كلت انه الحفاظه لازم تتبدل بكثره
في حين هذا ما يحتاجلها طبيب يكول
4. تنتقد الحديث عن الرز المطبوخ انه لازم ينخزن خلال ساعتين بعد التحضير حتى لا تنمو بيه بكتريا
و المتلازمه معروفه اسمها
متلازمه الرز المقلي اللي هي بالانكليزي
Fried rice syndrome
و تكول شو ننطيهم تمن بايت و ما بيهم شي
تكمل الام قصتها و تكول اني لغيت المتابعه لان حجيه كله غلط
اكيد ما انقهرت على اللايك المقدس
و لا انقهرت عليها لان هاي حياتها خياراتها
انقهرت على اطفالها و الله
انقهرت على اطفال هذا الوطن و الله
اني كل فتره اكو كم شخص اسويلهم بلوك و بعدين اروح اصفر قائمه الحظر اكول خطيه اولادهم
يتعلمون ولو بوست صغير
اقروا عيوني انتوا
اقروا عن الاعراض الجانبيه
اقروا عن كل شي
لا تصدكون بيه
صدكوا بالكتب بالمصادر المعتبرة
و الغوا اللايكات من صفحتي
اني اكيد ما مفتح الصفحه حتى اجيب لايكات !!
و لا مفتح الصفحه حتى اجيب مراجعين لان اللي مراجعني يعرف شنو مواعيدي و اهل منطقتي ما ملحك اشوفهم كلهم و دا يزعلون مني لان يتاخرون
اخر ملاحظه :
اسمي سيف سمير
اكو غير طبيب اسمه كذلك سيف
بس مو سيف سمير
مو اني اللي كلت الكارونه ما تجيكم
د. سيف سمير البياتي
اخصائي طب الاطفال
