اليوم موضوعنا مهم
هو عن الرضاعه الطبيعيه و بعض المعلومات الاساسيه عنها
مع الاسف بالعياده من يراجعوني الاهل و اسال عن سبب كون الرضاعه صناعيه يكون الجواب : دكتور مو ما نزل عندي حليب
بهذا المقال اكيد ما راح اتحدث عن اهميتها لصحه الام و الطفل بس اتناول بعض جوانبها المهمه و الطريقه الامثل لرضاعه ناجحه
الرضاعه الطبيعيه و الحليب هي المصدر الوحيد للماء و الغذاء باول فتره من العمر و كلما نختار النوعيه الاحسن و اكيد الاحسن هو حليب الام لان و لا حليب صناعي يوصل الى حليب الام راح نحصل النتيجه الاحسن
الرضاعه تستمر حتى بعد ما يبدي الطفل ياكل الى حد عمر السنه او اكثر حسب رغبه الام و طفلها
الرضعه الاولى تبدي اول ما تكدر الام ترضع بعد الولاده و اي حجه للتاجيل مرفوضه و المفروض تبدي بصاله الولاده وتبدي بانه تنطيه رضعه من جهه لمده 5 دقايق و تحول على الجهه الثانيه لمده 5 دقايق اخرى الفكره من التحويل حتى يحفز على انتاج كميه اكبر من الحليب
و يفضل تكعد الام و بصاله الولاده و مسند لرجلها و تحمل ابنها على ذراعها و ترضع الطفل
من بعدها ماكو داعي ترضعه الجهتين و انما تفرغ جهه وحده و تنطي الجهه الثانيه اذا بعده جوعان و بالرضعه الثانيه تنطي الاخر و تترك الفارغ و هكذا
عدد مرات الرضاعه تتراوح من 8 الى 12 رضعه باليوم
و لازم الام تعرف شون تفتهم انه طفلها جوعان
ماكو شي اسمه كل ساعتين او كل 3 ساعات
الرضاعه تكون حسب الحاجه و ما مسموح البته باستخدام الملهيه باول ايام
مراحل انتاج الحليب
اول يوم : كميه ضئيله من الحليب ( حوالي 5 سيسي)
من يوم 2 الى 4 : زياده بانتاج الحليب
اليوم 5 : تبدي الام تحس بان الثدي ممتليء و قد ينزل حليب اذا ترك بدون رضاعه
اليوم ال 6 و فوق : تبدي تحس ان الثدي قد فرغ بعد الارضاع
الاهم و المهم جدا انه ان تحافظ على اكلها و تشرب حليب هوايه و اذا ما تحب الحليب لازم تاخذ كالسيوم و سؤائل بكميات كبيره
