الصفحة صار لها 4 سنوات تنشر بمواضيع الاطفال
وكلما نريد نتقدم ، اتفاجأ بكل مره بان الاساسيات ضايعه
واكو خلط واضح (من البعض طبعا وليس الكل)
بين الرعاية والتربية
الرعاية بيها حدود واضحه جدا
بين افضل شئ واسوأ شئ
يعني الرضاعة مثلا ، افضل شئ هو الرضاعة الطبيعية
اسوأ شي هو اختيار الحليب الغير مخصص للاطفال
التغذية مثلا: افضل شئ هو الطعام الصحي الطبيعي
اسوأ شئ هو اعتماد الجبس والنساتل كغذاء يومي
هاي الامور هي حقائق / fact
مثل ما االثلج بارد والجمر حار، هاي حقيقة لاتقبل النكران ولا النقاش
يعني ما ممكن تكولين يلا شكو بيها اشرب ابني حليب أكياس عليش حليب قواطي وعليش رضاعة ماهو كله حليب شحيصير قابل!! حيصير هواي !
اما موضوع التربية فالامر مختلف تماماااا
لو جانت التربية شكل واحد ونمط واحد جان هسه احنا كلنا نسخ مكرره
التربية ما بيها حقائق بقدر ما بيها توافق واتزان
من اجمل ما قرأت لدكتور ديدسون وهو (طبيب) اطفال (مختص) نفسي له خبره في مجاله عشرات السنين ، يعني عنده عياده يعالج بيها الاطفال لمده تزيد عن ( 20 سنه ) و دراسته لاتقل عن 8 سنوات
يقول وهو لديه 4 اطفال (حسب ما اتذكر ) انه بكل مره يرزق بمولود ،، يشعر انه لايعرف اي شئ تماما
لا يعرف اي شئ
نهائيا ..
عن تربيه الأطفال 😂
ليش؟؟
لان التربيه هي مو وصفه نمشيها على كل طفل
هي مو طريقه تحضير زجاجه الحليب ونبقى نكررها وي كل طفل!
لتقريب الفكره
ام لديها توأم ، ذكور
يعني كبرا في نفس الرحم لنفس الام وولدا في نفس البيئه في نفس الوقت
وكلاهما نفس الجنس
تقول الام عندما يقوم احد اطفالي بالعبث انظر له نظره غضب فيتوقف فورا وتتغورق عيناه بالدموع
اما الاخر !!! فانظر له ، ولا يكترث! اسحبه من مكان الخطر , فيعود مسرعا! اكرر الامر ! وهو يضحك ولا يبالي!
هل من المعقول تبقى تباوع له نظره غضب!!! والله شنو لان الطفل الاول استجاب مفروض هو هم يستجاب؟؟
للاسف هواي تتصور لمجرد يكون عدها طفل واحد او تقرأ كتاب ونص عن التربيه حسبالها هاهيه هي احاطت بالموضوع وصارت خبيرة والاحلى تطلق على نفسها استشاريه 😂 وتطالب بمبالغ مالية لقاء خبرتها العريقه !؟
لا وازيدكم من الشعر بيت اكو بالجديد حتى ما عدها اطفال وهم تعتبر نفسها استشاريه تربويه 😅لمجرد حضرت دوره ام ساعتين 😅 الامور كلش طيبه 👍
نرجع لموضوعنا ونربط ونكول
طفلج الأول اذا مشى وياه اسلوب معين بالتربيه مو بالضروره ابدا يمشي مع طفلك الثاني
طفلك الوحيد والفريد مايشبه كل اطفال العالم
ولا الي نجح وياه ينجح وي باقي اطفال العالم
لذلك مواضيع التربية بالذات
بيها هواي نظريات
كلش هواي
وهواي منها ناس تعاكس ناس
وكل نظريه الها مؤيد وداعم وادله توكد انها ناجحه
لكن ياهو نختار؟ تبقى هاي وظيفه الام والاب ! والا مجان صارت بهاي الصعوبه لو هي طريقه وحده وخلص
وللعلم حتى الطرق الحديثه متناسب كل الاسر
يعني احنا صح ندعمها ونشجع عليها بس خل نكون واقعيين كثير من الاسر ماتكدر تطبق ولا ربعها
رباط السالفه وين؟
ببوست الوحش والسرير جان اكو تعليق يكول وليش هاي الطريقه ما خوب احضنه واطمنه وهو حيهدا وينسى!
والله ياعيوني اذا طفلج مجرد محتاج الاطمأنان والمسانده فمو كل طفل عنده هاي العرض (الخوف) هو بسبب نفس المشكله!
ارجع اذكرج مو كل الاطفال مثله والا مجان كتبوا هاي الطريقه بالكتب
لا والاحلى تتهمنا انه احنا متخلفين وما مطلعين 😅
ممكن طفل اخر يشكو من الخوف بسبب انه هو غارق بالخيال ومديكدر يحط حل
وها طبعا البوست السابق يحجي عن تقنيه معينه فقط وليس شامل للتعامل مع الخوف بشكل كامل
واذا نكتب هيج بوست هم تزعلون وتكولون وي طويل شيقرا 😑
ارجع اعيد واذكر
التربيه هي ان تلكه الطريقه الي تناسب طفلك ، بالتوقيت المناسب، وتكون قادر على ادائها دون ان تضرر بصحه طفلك النفسيه
اكرر صحه طفلك النفسيه
وليس الصحه النفسية
لان صحه طفلك النفسيه احتياجاتها تختلف عن طفل جيرانكم
طفل جيرانكم ممكن مشبع من ناحيه الحنان لكن يفتقر للاحساس بالمسؤلية
ممكن طفلك شجاع جدا وعنده احساس عالي بالمسؤلية لكن يفتقر لجرعات حنان اضافيه
بالختام
انصح دائما من تقرون مواضيع التربيه شوي ريلاكس ، مع تفكير هل هاي الطريقه تناسب طفلي؟
هل طفلي يحتاج هيج توجيه؟
هل هاي الطريقه حتساعده لو العكس؟
لان هي هاي شغله المربي
واحنا كصفحه واجبنا فقط نطلعكم على التقنيات والابحاث الحديثه
يبقى التفيذ ووقت التنفيذ وطريقه التنفيذ ومع من التنفيذ، هاي تبقى عليكم 😁
مع مودتي 🌷
د.اسماء اسماعيل البدري