اكو تقنية تسمى الانعكاس
والي هي ان نصير مثل المرآة امام مشاعر الطفل ، تعكس احساسة ونخلي لها اغلاق، او خاتمه او conclusion
يعني شنو 😑
ناخذ مثال ،
وقت نوم الطفل وبدأ الطفل يعبر عن مخاوفه
مثلا اخاف اكو جوه السرير وحش، اخاف يجي الحرامي.. الخ
اذا كلناله ماكو وحش/ ماكو حرامي
محنطلع بنتيجه
لان بجوابنا هذا يحس انه احنا دننكر خوفه
ومدنصدك بي
بينما هو ديشعر فعليا بخوف
وبالنسبة اله الخيال والواقع هو واحد وصعب يفصل بناتهم
لذلك اكرر، الانكار مو هو الي حيحل الموضوع
بالعكس حيأزمه ويوميا حنسمع نفس الشكوى ونفس المخاوف حتى لو كررنا ماكو وحش زليار مره
لعد الحل شنو؟
الحل هو باستخدام تقنيه الانعكاس ونعكس مخاوفه
ونكله يا اكو وحش جوه السرير؟؟ حيكول اي
نكله صغير لو كبير ؟؟
حيبدي هنا الطفل يطمأن ان مشاعره مسموعه وانه يكدر يعبر عن مخاوفه باريحه
حيختار، مثلا كبير او صغير ماكو فرق
هنا نخلي الخاتمه
ونسوي ممكن تمثيل بان نمد راسنا جوه السرير ونكول لزمته ونكتله ونجره من رجله ونفره نفره نفره ونشمره بحيث يطييير ويوصل للقمر ويعصى هناك وبعد ميكدر يرجع ابد 😁 مع أصوات تمثيلية بشكل مرح
او نختار خاتمه الطفل يكون هو بطلها وممكن نسلحه باسلحه حسب ديانه ومعتقدات الاسره
اذا كانوا مسملين شي جميل جدا نعرفه بايات التحصين واذكار الحفظ ونكله بس تكولها تجي الملائكه تحرسك وتنهزم كل الوحوش
واذا كانوا من ديانات اخرى يمكن استخدام ادوات بسيطه مثلا سكين بلاستك ونكله اطعن الوحش وغيرها من الافكار الي تخلي هناك خاتمه لتخيلاته وميبقى يدور بيها .
البعض حيكول شلون هيج معناها حنعزز افكاره وبعد صعب ينساها
الجواب لا ابدا
هاي الافكار الها مسبب وانكارها هو الي يخلي يتمسك بيها اكثر واكثر 👍
مع مودتي 🌷
د.اسماء اسماعيل البدري