#دور_الاب
للاب دور مباشر وفطري في تربية الاطفال، لكن بعض الاحيان الاب ماشاف النموذج الي يقتدي بي حتى يتقمصه، يعني هو نشا في بيئه الام هي فقط حاضره في تربيته وبالتالي هو فعليا مايعرف شلون يمارس دوره بشكل مباشر
فحتى نغلق هاي الفجوة ننصح الزوجه بان تساعد زوجها ان يستعيد فطرته مع الطفل من خلال مجموعة نصائح:
1️⃣اولاً: عند حدوث الحمل بشري باسلوب حلو..طبعا هذا هو الغالب بأول طفل.. لكن للاسف تتراجع هاي الفعاليات بالطفل الثاني أو الثالث ..
الفكره هنا حتى لو عاشر طفل لازم تحسسي بالفرحه .
مو تجين مبومه لو تولولين وعزه العزاني وشلون وإني جنت اخذ مانع ومن هالسوالف. صار طفل خلاص انتهى احمدي ربج وفرحي انتي وزوج.. 😅
2️⃣ثانياً: نزلي تطبيقات مال متابعه الحمل وكل شهر بشهر تدزيله الجنين هسه بكد الخوخه مثلا .. هسه كمل العمود الفقري.. هسه بدت الملامح تظهر وهكذا..أو تتفرجون التطورات سوى🥰 اذا هو يتواجد يمج لوقت كافي.
3️⃣ثالثاً: من يبدي يركل خلي يلزم بطنج ويحس بركلاته.. وكولي له يااا شلون يحب يتحارش بيك .. 😍 واحجي وي الطفل كليله هذا بابا ديسلم عليك .. وقبل النوم كولي للاب مثلا مكلت للبيبي تصبح ع خير أو مقريتله معوذات..
4️⃣رابعا: دزي صور ع تلفون لاباء وي أبنائهم .. بمختلف الأعمار.. كل هاي حتى تعزز فكره الابوه..
5️⃣خامسا: خلي يشوف الطفل بالسونار وياج.. صحيح هواي عيادات متسمح بس هم اكو يقبلون.. مو شرط كل زياره بس مهم جدا يشوفه قبل ميجي حتى لو مره وحده.
6️⃣سادسا: وقت الولادة تكعدي يجي وياج واذا يداوم يأخذ إجازة مو ترحين وي اهلج وهو آخر من يعلم! 😑
ويبقى يمج بالمستشفى .. منكول مثل الاجانب خل يحضر الولادة لان هالشي للاسف شبه مستحيل بس اقلها يبقى بالمستشفى🏥 واذا طبيعي خلي يسمع المج وصراخج..🙊
واذا عمليه يشوفج ويسلم عليج قبل متدخلين للصاله.. مو نايم بالبيت لو طالع وي جماعته ويخابروه مبروك مرتك جابت 😑😑
7️⃣سابعا: اجى الطفل بخير وسلامه لازم تخلي يشيله لتكليلي ميعرف تره انتي هم متعرفين! خلي يكون علاقه وياه .. وياحبذا يكبر ويأذن بإذنه مثل معلمتنا السنه النبوية.❤️
8️⃣ثامنا: رجعتوا للبيت مو كبل تختفين ببيت اهلج وهو يروح يسرح ويمرح وي أصدقاءه 😶
اقلها اول يومين يبقى يمج ويبدل حفوظه البيبي ويشوف العقي.. ويسهر وياج ويشيل الطفل يتريعه.. تكولين عنده دوام وميكدر اوكي يوم بالاسبوع جمعه ع سبت خل يسهر ويحط الطفل ع جتفه وينومه ويغنيله.
هاي الفتره ذهبيه وبسرعه حيكبر الطفل بيها لازم تخلي يشوف شلون دينمو طفلكم..
واكيد كلما يكبر كلما اوكلي له مهمات، مثلا يطلعون لوحدهم، يسبحه، يلعبه … الخ حتى يكونون رابطه قويه وبالتالي مشاعر وبالتالي تعامل تربوي وياخذ الاب دوره
📍زين شنو حيصير اذا عفته وبقيت اني شايلة الدورين.. يمكن وحده منكم تكول هاي أبرد راس الي! لاعزيزتي هذا مو شي يخصج وحدج حته تقرري .. هذا حق الطفل.
ليتيتمين ابنج وابوه بعده عايش!
والاب انطي فرصه لنفسك حتى لو تحس هاي الامور غير مريحه ،، اطلع من دائرة الراحه ومارس حقك الابوي وانطي لطفلك حقه بان يشعر بوجودك واهتمامك في حياته ولاتكون مجرد صوره خيال بذاكرته
مودتي 🌷
د.اسماء اسماعيل البدري
from د. سيف سمير البياتي