ذاكره الاطفال انتقائيه
فاختاروا ذكريات اولادكم بعنايه
فمن تعاقب ما راح يتذكر ليش عاقبته !!
بس يتذكر اذا عاقبته بشده او قسوه
تذكرولي قواعد العقاب !
اولا : لا تعاقب طفلك على شغله انت تسويها
لا تعاقبه لان يكذب و انت تكذب
لا تعاقبه لان ما رجع الشغله لمكانها و انت ما ترجعها لمكانها
لا تعاقبه لان ما يقرا و انت ما فد يوم شافك تقرا كدامه
لا تعاقبه لان يتاخر بالنوم و انت سهران
يتعلمون مننا كل شيء
احنا بالنسبه الهم مثال
خليك الهم مثال
ثانيا : لا تصعبها جدا
لا كلشي تحاسب عليه
اكو اشياء ممكن تجاوزها
نبهه عليها
تذكر الطفل ذاكرته قصيره
الاخطاء الصغيره فقط ذكره و نبهه
.
.
العقاب فوري و الان
ماكو شي اسمه بعدين او جمعتلك هلكد اخطاء راح اعاقبك
ما راح يتذكر
المكافئات جمعهن
بس العقابات بلحظتهن
ما راح يفتهم الطفل اصلا ليش تعاقب
العقوبه خليها تكون مرتبطه بالخطا
يعني كسر لعبته كوليله ماكو لعبه بعد
سوه تصرف مو لائق باللعب كوليله محروم من اللعب كذا يوم
دائما خلي العقوبه من جنس الخطا
.
اهم نقطه لا تهددين و تتوعدين و ما تسوين بالعكس تكونين خليتي الموقف اسوء من قبل
لان راح يستهزء بالعقاب كله و ما يحترمه اصلا
.
.
الله يخليك بلا تهديدات من نمط اذبحك اكتلك اكسرك اصيحلك ابوك اصيحلك الشرطي اصيحلك الحرامي
هوووب
احنا جايين نربيه مو نسويله فلم رعب
.
اقرا كثيرا عن موضوع كيفيه العقاب
وحده من اهم الوسائل هو التحذير بالعقاب
و يكون بشكل واضح و صريح
يعني اذا ما ترتب غرفتك ما راح اخليك تلعب بالالعاب بعد لمده اسبوع
.
.
مو تفضحين الولد او البنت وره العقوبه
يعني تكولين لخالته و عمته و جده انه فلان متعاقب
ابدا
غير مقبول هذا التصرف
علاقه داخل البيت مكانها داخل البيت ماكو اي داعي تحرجين الطفل ابدا
.
لا تبالغ بطموحك من طفلك
خليك متواضع باحلامك
لا تخليله هدف ما يكدر يحققه
و لا تغير القانون
يعني فلان تصرف غير مقبول
انتهى
مثلا ممنوع التلفون يجي على ميز الطعام
مو اليوم يصير باجر ما يهم
لا الممنوع ممنوع
اليوم و غدا و بعد غد
.
.
هذه النقطه للاباء
لا تصور نفسك ابدا الصدر الحنين
و من الام تعاقب تعترض انت و تكول ليييش
العقاب يتنفذ و يكتمل و ما ينكسر و تتناقش ويه الام على جنب
ممنوع كسر عقاب الام او الاب من قبل الطرف الاخر
امدحوهم كافئوهم بهديه صغيره لحسن التصرف لا تقصرون وياهم ابدا معنويا
د. سيف سمير البياتي
اخصائي طب الاطفال
