راح اختصرلكم كم بوست هنا حسب آرائي النابعه اكيد من بحوث و توصيات و دراسات
و اللي ممكن تختلف من طبيب لآخر حسب الجمعيه و المنظمه اللي يتبعها
.
.
🤔 شنو رايك بالكحول لتعقيم السره؟
اني اكول مثل ما منظمه الصحه العالميه تكول اتركها جافه فقط و خارج الحفاظه
ممكن غير زملاء يكولون مثل ما الأكاديميه الامريكيه لطب الأطفال تكول استخدم الكحول لحد ما توكع
اني اشوفها مالها داعي
😃 شنو رايك بفيتامين دي و لشوكت استمر؟
اني اكول مثل ما الأكاديميه الامريكيه لطب الأطفال تكول فيتامين دي يعطى لكل الأطفال اللي يرضعون طبيعيا او اغلب رضاعتهم طبيعي و الأطفال اللي يرضعون صناعيا افحصه و اقرر
غير دول مثل تركيا تنطي فيتامين دي لكل الأطفال بغض النظر عن رضاعتهم
😁 شنو رايك بالحجله؟
اني اكول مثل ما الأكاديميه الامريكيه لطب الأطفال تكول ما تساعد ع المشي و خطره و مالها داعي
😇 شنو رايك بالملهيه؟
اني اكول مثل ما الأكاديميه الامريكيه لطب الأطفال تكول عادي ممكن استخدامها عند النوم فقط فوك عمر شهر و ما تستخدميها أكثر من ٦ اشهر إلى ١٠ اشهر
😅 شوكت اترك المميه؟
اني اكول مثل ما الأكاديميه الامريكيه لطب الأطفال و الأكاديميه الامريكيه لطب اسنان الأطفال تكول الفطام من المميه بالسنه إلى سنه و ٣ اشهر بالزايد
😀 قبل اخر سؤال دكتور انت من جماعه نوكل الطفل ب ٤ اشهر لو ب ٦ اشهر؟
اني من جماعه نوكل الطفل ب ٤ اشهر حسب شروط معينه منها انه يكدر يرفع رأسه الطفل و ضاعف وزن الولاده لان اكو بحوث تكول كلما توكلين من وكت كلما يقل من تحسسه بالمستقبل و كلما يكون تقبلا للطعام
اذا طبيبك يكول من ٦ اشهر فهو يتبع راي منظمه الصحه العالميه اللي تكول الاكل من ٦ اشهر
👯♀️ آخر سؤال و الله ننطي مي للطفل اقل من ٦ اشهر ؟
كل منظمات الدنيا تكول لا داعي للماء اول ٦ اشهر و ما تنطين مي الا من الاكل يصير صلب شويه
د. سيف سمير البياتي
اخصائي طب الأطفال
