#سلسلة_الرضاعة_الطبيعية
الرضاعة المختلطة.🍼🤱
هل الرضاعة المختلطة افضل من رضاعة طبيعية فقط؟
☑️الجواب لا
📍كل اخصائين الرضاعة الطبيعية حول العالم لا نشجع على الرضاعة المختلطة (حليب صناعي + ممه + الرضاعة الطبيعية + ملهية)
ℹ️زين هل هي مضره؟ أو ممكن تؤدي إلى نتائج سلبية؟ ⁉️
☑️الجواب
نعم.
نعم
نعم تؤدي إلى ضرر ومشاكل 👎
😳شنو هاي الاضرار؟! والنتائج السلبية؟ 🤔
🔊شوفوا حبايب كالاتي :
🛑أولاً : ممنوع يجرب الطفل اي حلمة صناعية (ممة او ملهية) قبل عمر ال٦ أسابيع منعا باتا قاطعا 🙅 (مادام ماشين وياه صح بالرضاعة الطبيعية) ليش؟ 🤔
لانة :
1️⃣ الطفل حاليا معدته جدا جدا صغيره👌 ويحتاج كل قطره غذاء من حليب أمة💧 .. اذا اخذ ملهيه بهاي الفترة العمرية الحرجه “عباله ديرضع”😟 ويبقى يمص ويمص ويمص لحد ميتعب😔 وينام 😴 وحتفوت عليه رضعة أو حته لو جزء من رضعة جان مفروض يستغل بيها هاي الطاقه مال “مص” ويرضع بيها من أمة 👩 ..
زين واذا فوت جم رضعة شحيصير قابل! 😏
✅حيصير ناقص نمو👎.. يعني وزنه ميصعد⚖️ بالشكل الكافي🤦🏽♂️ لان مديتغذى بالكمية الكافية .. 😔
وبعد شهر 📅 نودي للطبيب 👨🏻⚕️ حيكولج وزنه ناقص! وتجي العمة👩🏾 أو الجده الحبابه👵🏽 وتكلج اي طبعا 😡 عبالج حليبج بي خير ! لما سكطتي الولد 😤 !! مو كتلج انطي ممه 🤦🤦🤦🤦🤦🤦
2️⃣آلية مص الملهيه و الحلمة الصناعية (ديس الممه) 🍼مختلف تماما عن آلية مص صدر امه .. 👩
✳️✳️التفصيل:(شرح ميكانيكي)
💡مص صدر الام يتم :
١.بحركة لسان الطفل 👅 باتجاة الحنك (سقف الفم) مع تسليط ضغط باستخدام عضلات الخدين ليحدث تفريغ للحليب من الصدر حسب خصائص اختلاف الضغط (فيزيائياً)
٢.وباستخدام الشفة 👄ليحفز الثدي على در الحليب من خلال الضغط على (الغدد حول الهاله)
٣.واستخدام عضلات الفكين + عضلات اللسان +البلعوم لتحدث عملية البلع.
💡عملية مص الممه 🍼:
تتم باستخدام ضغط بسيط جدا من عضلات الخدين + بلع باستخدام البلعوم .
فقط 😶
فقط
فقط..
شفتوا الفرق؟ 👀
هذا الاختلاف الكبييير يؤدي إلى حالة علمية اسمها (ارتباك الحلمة)
يعني شنو؟ 🤔
يعني الطفل 👶أجى ديرضع من امه وتعلم اخيرا بعد معاناة وجهد منه لأن العملية معقده .. وصار عندة فكره شلون يرضع..👍
وره شوية جتي امه الحبابه 👩 عبالها دتسوي زين وانطته ممه 🍼..
الطفل عباله حيرضع نفس الشي اشو اجى يرضع شاف الحليب ديزل كبل بدون أي جهود🤩 بس يدوب يمص شووووويونه ويبلع !! 😋
كال هاا هاي خوش طريقة طلعت اسهل😁 ..
لغى الفكرة القديمة (الي تعلمها) وحط باله هاي الطريقة السهله البسيطة.
ورة شويه هم جتي امه الحبابه 👩 وكالت خل ارضعة خطيه شالته وحطته على صدرها🤱 اجى ديرضع مثل متعلم من الممه 🍼 اشو هاي السالفه رجعت صعبه 😧!! اهووو
ويبلشش البجي وااااا 😭😭
الام حتكول يا ميريد صدري 😶.. جيبوا الممه🍼 🏃.. واقرة على الرضاعة الطبيعية السلام 🖐️🤦
او باحسن الاحوال تكول لا شنو هاي😞 لازم ترضع وتظل تحاول وياه لما خطيه يكتله الجوع☹️ ويرجع يرضع بالطريقة الاولى وترجع تتخربط البرمجه وباختصار العبارة “ينثول” 😕
هاي الحالة (ارتباك الحلمة) -عادي دوروا عليها بالكوكل او يوتيوب-
رح تخلي مشتت 🙄 ومتيّه🙇🏻♂️ وبالاخير يبزع من هذا الاختلاف ويختار وحده منهم.. وطبعا شي اكيد غاليا حيختار الطريقة الأسهل..الممه!!🍼 ونقرة السلام على الرضاعة الطبيعية.🖐️
او تضطر الام أنه تبقى تشفط وتنطي وهالشي طبعا متعب.😪
اذا اخرنا الحلمة الصناعية (الممه🍼 او الملهية ) بعد عمر ال٦ أسابيع احتماليه أن يفهم 💡 الطفل انه هناك طريقتان ✌️للرضاعة ويختلفان عن بعضهما البعض تكون أعلى .. يعني يكوم يكدر يفرق -الى حد ما- وميصير عندة حالة ارتباك الحلمة.
3️⃣يحتاج الطفل الوقت الكافي ⏳ والإعادة مرارا وتكرارا 🔁 حته يكدر يتعلم و”يتقن” 👍 الرضاعة الطبيعية🤱 .. واي تدخل خارجي وتغيير 🙅♂️ رح يخلي يتأخر بالتعلم وحتى يفشل أنه يتعلم👎 ويكوم ميعرف يرضع مما يؤدي غالبا الى جفاف صدر الام😩 (لأنه مديعرف يفرغه بشكل جيد أو ديلتقم الحلمة بشكل خاطئ) وبالتالي مديصر تحفيز كافي وبالتالي رح يبدي يقل الحليب⤵️ الى أن يجف.😓
وتجي الام الحبوبه 👩🏼 تكول بس كملت الاربعين نشف صدري.. اصلا احنا ماعدنا حليب بالوراثة 🤦🤦🤦🤦🤦🤦🤦
🛑ثانياً: اذا نجح الطفل بالرضاعة الطبيعية فتره ال٦ أسابيع الاولى ممنوع ندخل الحليب الصناعي بكيفنا ..
ليش؟ 🤔
الحليب الصناعي حتى لو كان رضعة واحدة فقط باليوم ممنوع .. ممنوووع .. ممنوووووووووع…
ليش😶
لان
١. ◀️هاي الرضعة الي انتي تشوفيها قليله ‘بس وحدة’ 🙋☝️حتخلي حليب صدرج يقل⤵️ .. ووره جم شهر حتصير ‘بس ٢’ ✌️وحدة صبح🌄 وحده ليل 🌃 ..
وره شهر انوب حتصير ‘بس ٣’ لان خطيه مديشبع..😅
ووووو ..
بعدين تجي الام الحبوبه 👩🏽تكول دكتوره اني حليبي قليل لان رضع مني بس ٣ اشهر ونشف صدري!! 🤦🤦🤦🤦🤦وبقى بس على الممه !
💡ليش هالشي يصير؟
لأنه وباختصار الوقت⏲️ الي جان مفروض يرضع منج .. رضع صناعي وعاف صدرج ‘الرضعة الصناعية الوحدة’ وبالتالي مصار تحفيز .. وصار الفاصل بين الرضعتين الطبيعيه اطول ⌛من السابق .. وبالتالي انخفض الهرمون المسؤول عن تحفيز الحليب ⤵️
وببساطة الدماغ حيترجم انة الطفل
ميحتاج هاي الكمية .. ويقل الحليب..
وهلم جرا.. كلما زيدتي الصناعي كلما قل الطبيعي إلى أن ينشف.
✳️نفس المفهوم الي نستخدمة بالفطام .. نعبر رضعات بالاكل حته يقل تدريجا..
شلون ممكن نتجاوز هذا الشي؟❗ لازم بنفس الوقت⏲️ الي تنطي صناعي🍼 تسوين شفط من صدرج حته يبقى مستوى الهرمون عالي وميقل الحليب.. وطبعا هالشي متعب ‼️
٢.◀️ هواي نسبة من الأطفال تفضل طعم الحليب الصناعي (كلشش حلو) على طعم حليب الأم .. وبالتالي من تضوك الحليب الصناعي رح يعجبه ووبساطة يرفض اي طعم اخر!.
🛑ثالثا: نجحنا وي الطفل الحمد لله وكمل رضاعة طبيعية مدة ٦ اشهر او سنه او سنه ونص. وهسه بده ياكل وإني اريد انطي حليب صناعي أو حليب بقري (بعد السنه) ممنوووووووووع تنطي بالممة 😑👊
ليش؟! ☹️
لان الطفل كبر🧒🏼 !!! 😐
الممه عباره عن اختراع لطفل صغييير👶🏽 القدرات الحركية بعدها متنشطت .. فهذا الاختراع يساعده حته يبلع ‘فقط’ حته يكبر ..
مو من يكبر نجي ننطي ممه!!!! ‼️
زين انطينا ممه شحيصير قابل؟ 😏
اني اكلج: 😒
١. تسووووسس اسناااان 😬 خصوصا اذا شربها قبل النوم -طبعا (٩٠٪) ينطون الممه قبل النوم –
٢. تشووه بالفك خصوصا اذا يشرب هوواي ووياها ملهيه حيصير عندة تقدم بالفك او حالة طبية تسمى “انفتاح العضة” (open bite )
نفسها هم تصير للي يمص إصبعه هواي
٣. يلززززك بالممه 🍼ويتعلق بيها كلش 😻لان هالعمر واعي ويصير الفطام منها صعب الى حد ما.
٤. يستسهل الشرب بيها كلششش وبالتالي يبقى يعاند ومياكل ويكضيها بس شرب حليب ويصير فقر دم ومشاكل نمو..ووو..
او الام الحبابه تكول خل انطي بيها عصير 🤦🤦🤦 ويبقى مجلب بيها.
لعد شلون ننطي؟! 🤔
بالكووب بالكوب رحمة لاهلكم بالكوب🥛 ..
اكو اكواب لعمر ٦ اشهر و٩ اشهر ولعمر السنه كلش ممتاز 😊 ويخلي الطفل يطور قدراته ويصير بني ادم طبيعي مو شايل الممه ويفتر!
وهسه.. بعدها الرضاعة المختلطة زينه؟!؟
سؤال اخير .. لعد شوكت الام (الي ماعدها مانع صحي) تنطي حليب صناعي ؟
نبدي نفكر بالحليب الصناعي بالحلات الآتية:
1️⃣من الطفل مينمو 📈بشكل كافي حسب جدول الوزن والطول (وزنة اقل من الطبيعي)
2️⃣الطفل ميبلل حفاظات بكمية كافية (اكو جدول بالصور )
3️⃣الطفل بعد الولاده مديعرف يرضع نهائياً.
وبسسس فقط هاي الحالات .. مو تكليلي يزوع لو أحسه خفيف لو أحسه مديشبع .. عوفي الاحاسيس بالموضوع واعتمدي على النقط الفوك فقط ⬆️
⚠️زين فعلا اكو وحدة من هاي الحالات شنسوي؟
💡اول شي لازم نتوجهه لاخصائية رضاعة طبيعية ونتأكد ماشين كله صح بالرضاعة الطبيعية.(حتى لو استشارات اون لاين)
واذا طلع ماكو خطا نتوجة للطبيب حته يقرر
الحليب الصناعي المناسب حسب حالتة
(حساسية معينه) او (حاله تشوه في فم أو فك الطفل )
💥ملاحظات مهمه :
1️⃣الاطفال يختلفون عن بعض بشكل نسبي يعني لو ابنج أو بنتج او خالتج أو جيرانتكم انطت من البداية رضاعة مختلطة ومشى الحال ومصارت مشاكل وكمل مشوار رضاعة طبيعية للفطام فهاي نسبة قليله جدا .. مو معناها انتي الصح!!
تره اكو كومه يدخنون وميصير بيهم سرطان مو معناها التدخين ميسوي سرطان 😑😑👊
2️⃣الي نجحت بالرضاعة الطبيعية من البداية لاتخربيها على نفسج وعلى ابنج واسمعي مني انتي الصح 💪واستمري وعوفي الممه والحليب الصناعي 🍼🚫 وعوفي الحجي مال ناس متعرف من العلم بس الخرافات🤐
3️⃣في حال صار نقص عند الطفل سواء حديد أو فيتامين دال فالتعويض يتم بالقطرات حسب ارشادات الطبيب.. ومو بالحليب الصناعي اكرر
مو بالحليب الصناعي والممات🚫
مو بالحليب الصناعي والممات🚫
مو بالحليب الصناعي والممات🚫
4️⃣الي صار عدها ظرف أو حالة خاصة ومكدرت ترضع الكلام مموجه الج
الكلام مموجه لحضرتج
الله يكون بعونج وعون ابنج والكلام غير موجه الكم 😅
5️⃣في حال شفط حليب الأم واعطاءه للطفل بعد ٦ اشهر اتفقنا أنه بالكوب المخصص.. وقبل ٦ اشهر استخدام (السرنجه) أو الملعقة أو الكوب العادي . اكو صور 👇”تجنب الممه قدر المستطاع”
6️⃣اذا كان لابد من الاختيار بين الرضاعة المختلطة أو الرضاعة الصناعية بالكامل ف اكيد المختلطة افضل من الصناعية بالكامل.. لكن تذكري ستواجهك الكثير من المشاكل حسب مشرحنا 👆
7️⃣في حال واجهتي مرض🤒😷 _لاسمح الله_ والعلاج 💊يطلع بالحليب وممنوع الرضاعة الطبيعية وانتي تردين تستمرين ومتستسلمين ..
الحل عندج طبعا لازم صناعي هالفترة .. لكن خلال هالمده ابقي اسحبي من صدرج وذبي إلى أن تخلص مده العلاج.. الغاية من هذا الشي حته يبقى يدر صدرج ومينشف وبالتالي تكدرين ترجعين الطفل الرضاعه الطبيعيه المباشرة اسرع.
⚠️⚠️⚠️⚠️🖐️📣📣📣خلاصة :
هذا البوست للي تريد تنجح بالرضاعة الطبيعية ويهمها الموضوع ومتريد مشاكل انصحج بالمختصر::
ابدي باسرع وقت بالرضاعة الطبيعية بعد الولادة
واستمري
ثم استمري
ثم استمري
ولاتغيرين ولاتدخلين اي شي صناعي (مدام ماكو سبب حقيقي ) ..
وبهاي الطريقة تضمنين نجاحك بالرضاعة الطبيعية وبسهوله جدا حتى الفطام أن شاء الله🌹❤️
منشن للي يهمها الموضوع 🌹 او عدها سوء فهم 💐
د.اسماء اسماعيل البدري
