عند الاطفال كلشي يبدي ببساطه و بعدين يوصل للقمه و بعدها يبدي يقل !
❤ابو صفار مثلا
يبدي باليوم الثاني او الثالث و يبدي يصعد لما يوصل للقمه باليوم الخامس للسابع وراها يبدي يقل و يختفي باليوم العاشر لل ١٤ يوم
الا في حالات معينه مثل ابو صفار الناتج عن الرضاعه الطبيعيه اللي ممكن يستمر اكثر و أسباب أخرى مرضيه
هنا كاعد اكتب عن ابو صفار الفيزيولوجي او الوظيفي
❤ مثال اخر
الارتجاع المريئي هو حاله عاديه تصير عند 40 بالميه من الاطفال و شرطه انه الوزن يزداد و طبعا الارتجاع يزداد تدريجيا إلى أن يوصل للقمه بالشهر الرابع و بعدين يبدي يقل و يختفي بالشهر السادس للتاسع
و أحيانا يستمر لسنتين
❤مثله المغص الولادي
يبدي بالأسبوع الثالث إلى الرابع و يوصل للقمه بالأسبوع السادس للثامن وراها يبدي يقل و يختفي بالأسبوع العاشر إلى ١٢ و في حالات يستمر الى الشهر السادس
زين شنو قيمه المعلومه الطبيه هاي !
يعني اي شي خارج المألوف و المعدلات الطبيعيه نراجع عليه
يعني مثلا
اذا الطفل بدا بيه ابو صفار اول يوم
او صار عنده ابو صفار وره ١٤ يوم من الولاده و رضاعته مو طبيعي ضروري نراجع
اذا التقيؤ مثلا صاحبه انه الوزن ما يزداد نراجع طبيب
المغص اللي يستمر اكثر من ٣ اشهر هم نراجع بيه ممكن يكون لسبب اخر !
و كذلك البوست بيه طاقه ايجابيه انه هذا المر سيمر و يخلص
دمتم بود
د. سيف سمير البياتي اخصائي طب الاطفال
from د. سيف سمير البياتي