40 جوهره في طب الاطفال
تختصر الكثير
1. ماكو و لا حليب يشبه الحليب الطبيعي
لا يقتربله و لا يشبهه و لا يجي مثله
ماكو حليب صناعي بيه خلايا حيه تدافع عن طفلك مثل حليبك الطبيعي
لذلك موضوع احسن حليب و أقرب حليب لحليب الأم بعيدات جدا عن الواقع
2. لا ترضعين صناعي
حاولي قدر الإمكان ما ترضعين صناعي
محد يكول الرضاعه الطبيعيه سهله
بس الرضاعه الصناعيه مو سهله ابدا
و بيها دوخه و حيره أكبر من الحليب الطبيعي
و لا يثبطنك جماعه حليبك ما يكفي و حليبك يسوي ابو صفار و حليبك مو زين
حليبك هو الأفضل
3. اول رضعه هي اول لقاح لطفلك و رضعي بأول ساعه لأجل الصحه و المناعه
4. الرضاعه عند الحاجه مو بتوقيت و سالفه كل ساعتين ابتعدي عنها
الطفل من يجوع يرضع
الا في حالات معينه طبيبك يكولك بيها
5. بدا المغص
ارفعي طفلك عاليا أثناء الرضاعه
انتبهي لطعامك ممكن اكلك دا يسوي عنده انتفاخ
اكلي زين
انتبهي لنفسيتك
ساعدي طفلك يتجشا بنص الرضعه و بنهايتها
استخدمي حماله الاطفال
الكماط ينوم الطفل بس كماط امين و ماله علاقه بالساقين
رضعيه شويه شويه بلا رضعات كبيره
ابدي تمارين البايسكل و حركي ساقيه
ابدي قطرات السيمثكون
ما فادت جرب قطرات الكوليف
البروبايوتك بعدها ما موجوده بكثره
و اذا توفرت استخدميها
6. حضري فيتامين K و تاكدي انه الطفل اخذه
و حضري فيتامين دي لطفلك
و احفظي وزن طفلك عند الولاده
و اذا دمك O او نكتف افحصي دم طفلك مباشره
7. التسنين ما يسوي حراره
و لا يرفعها
التسنين يسوي انزعاج و بكاء و اي الكثير من اللعاب
بس حراره لا
8. مو كلما انطي فيتامينات اكثر
الطفل راح يطير اسرع
الفيتامينات مو خاليه من الاعراض الجانبيه
و لا تستخدميها بلا وصفه طبيب
9. الطعام ممكن إدخاله بعد الأسبوع ال ١٧ او بعد عمر ١٢٠ يوم
ابدي اول شي بالحبوب المنفرده
و اصعدي تدريجيا
ابدي بالخضراوات
و بعدين الفاكهه
10. السيريلاك اوكي بس ما نبدي بيه
نبدي بطعام البيت
و نبدي بسيريلاك الرز ثم سيريلاك الشوفان و اخر شي الحنطه
و مره او اثنين عادي بالأسبوع اوكي
بس اكل البيت اكثر فائده
11. الحليب البقري ممنوع تحت عمر السنه
بس اللبن مسموح من عمر ٦ اشهر
و الجبن مسموح من عمر ٧ إلى ٨ أشهر
12. البيض ابدي بالصفار من عمر ٦ اشهر
وراها بياض ب ٣ ايام
و اهم شي تطبخيه زين و تخلين النار تطبخه 5 دقايق او اكثر
13. طفلك اللي ما ياكل سببك انت مو هو
اما دخلتي الاكل قبل 17 اسبوع
او اخرتي الطعام بعد 8 اشهر
او عرفتيه ع اطعم حلوه اولا و مكضيتها جبس و نستله و عصير
14. و على الرغم ان الاكاديميه الامريكيه لطب الأطفال منعت العصير تحت عمر السنه لا زال الكثير يتصور بوجود فائده من إعطاء العصير
العصير ممنوع من الاكاديميه الامريكيه لطب الأطفال تحت عمر السنه و بعد السنه قللي العصير الطبيعي و الصناعي
الغايه هو تعليم الطفل على الطعام مو على الشراب اللي اصلا تعلمه من الولاده
15. تريد طفلك يحجي من وكت علمه ياكل من وكت
اكيد مو قبل 4 إلى 6 أشهر
عضلات الكلام هي نفسها عضلات الطعام
16. عوفي النستاكورت و خلطات الصيدليات لمناطق الحفاظات
تغيير مستمر للحفاظه
و عصاره زنك او سيباميد او يورياج او موستيلا او بيبانثين او جيكو ويه كل تغيير حفاظ كلش كافيه
17. ارتفعت الحراره
قللي الملابس
افتحي المروحه
ابدي بندول 120 ملغرام او باريستول 120 ملغرام بجرعه نصف الوزن
يعني وزنه 10 كيلو انطيه 5 سيسي
وزنه 8 انطيه 4 سيسي
لا تستخدمين التحميله ام ال 125 الا لوزن 8 كيلوات و اكثر
ما فاد استخدمي بروفين فقط إذا عمر الطفل عبر ٤ أشهر بجرعه مقدارها ثلث الوزن
وراها نراجع طبيب او استشاريه اذا ماكو اعراض أخرى مو نروح للطواريء الا اذا اكو قيء مثلا او ضيق نفس او عمر الطفل أقل من شهرين
18. اذا تعلمتي شون تنظفين الأنف كلش كافي
مجرد قطاره ملحيه او بخاخ ملحي اكثر من كافي
19. الأنف اللي ٢٤ ساعه يرشح و ٧ ايام بالاسبوع ينضح و طول السنه ما راضي يتوقف هذه حساسيه انف مو نشله مستمره
20. طفلك اللي صدره يتنك بأبسط نشله هذا مو التهاب صدر
هذا تحسس قصبات
و افضل علاج للتحسس هو البخاخات و جهاز التبخير
21. الأنف اللي ينزل سوائل لفتره اكثر من اسبوعين مستمره بدون انقطاع هذه حساسيه انف مو نشله
22. حساسيه الأنف و ان بدت سهله الا انها احيانا تكون مقاومه لكل انواع العلاجات
و افضلها طبعا البخاخات الموضعيه
23. القيء يحدث لعده أسباب منها التهاب الامعاء و التهاب الجيوب الانفيه و التهاب الاذن و انسداد الامعاء و التهاب المسالك البوليه و ٥٧٥٥٧٥٤ سبب آخر
لذلك نركز بموضوع القيء ان نراجع طبيب اذا تكرر اكثر من ٤ مرات
24. الاسهال حله تعويض سوائل و BRAT غير هالشي شكليات
25. الامساك تعريفه ان يكون قوام الخروج صلب و صعب الخروج
و تختلف المده الطبيعيه بين طفل و اخر و حاله و أخرى
بس اكثر تعريف هو أن يكون الخروج صلب و اقل من مرتين أسبوعيا
الشرط الاول صلب !!
26. لو نغير الحفاظه هوايه ما راح يصير طفح حفاظات
و لو نغسل المنطقه بالماء ما راح يصير طفح حفاظات
و لو نهتم بصحه الجلد
ما راح يصير طفح حفاظات
27. تردين مناعه ابتعدي عن السكريات
تردين مناعه ابتعدي عن المضاد الحيوي بدون وصفه طبيه
28. خافض الحراره وجد لاراحه طفلك لا اكثر
مو شرط تنزل الحراره إلى الرقم الطبيعي
بس المهم الطفل مرتاح
29. الكالسيوم و فيتامين دي ما تخلي الطفل يطير و الله
و لا تنطين فيتامين دي من راسك او لان ابن فخريه مشى بعمر سنه و ابنك بعده ما يمشي
المعدل الطبيعي للمشي هو ٩ إلى ١٨ شهر
عادي يتأخر الطفل بالمشي مو مشكله
30. المعدل الطبيعي للتسنين هو ٦ إلى ٩ اشهر و ما نكول متأخره الاسنان الا بعد ما يعبر عمر الطفل ١٨ شهر
مو شرط ابن بدريه طلع اسنان بال ٣ اشهر ابن خيريه لازم تطلع اسنانه اليوم
عادي اني بناتي وحده طلعت اسنان ب ٣ اشهر و الاخرى عمرها ١٥ شهر يلا طلعن اسنان
و الاثنين رضاعه طبيعيه
و الاثنين ياخذن فيتامين دي
31. الحجله ما تساعد على المشي و اكو دراسات تكول انه الحجله تؤخر المشي
و حوادث الحجلات خلت كندا تمنعها و تمنع التداول بيها
تخافين عليه لا تخليه بالحجله
الشغل عندك اهم من طفلك خليه بالحجله
بس اني كلتلك لا تخليه اوكي ؟
32. الطفل اول ما يمشي يوكع ٧٩ مره بالساعه
تخيلي بالدقيقه مرتين يوكع
و بنهايه السنه الثانيه يوكع ٣٩ مره باليوم
يعني موضوع المشي ما مضبوط
اي المشي ما مضبوط و يحتاج ٣ إلى ٤ سنوات يلا ينضبط
33. تقويه المناعه ؟
تعرض كافي للشمس
ماكو حلويات و جبس
اخذ كل اللقاحات
الابتعاد عن التدخين
رضعي طبيعي
نوم كافي
فواكه و خضروات
و اهم شي اللبن لصحه الجهاز الهضمي
34. الشمره الحراريه تصير عند الاطفال اللي عدهم استعداد للاصابه سواء نزلتي الحراره اولا
فالشمره تصير بالارتفاع المفاجيء او الانخفاض المفاجيء للحراره
لا تستعجلين تنزيل الحراره
35. ماكو شي اسمه انطيه علاج بسرعه حتى لا تنزل لصدره
تنزل للصدر دائما عند الاطفال اللي عدهم استعداد للاصابه بتحسس القصبات
36. الاسهال عدوى و انهي النقطه هنا
37. الطفل اللي ينجبر على الاكل يتقيا
الطفل اللي ينحجي بالأكل هوايه كدامه ما ياكل
الطفل اللي ينجبر على فلان اكله راح يكرهها عمره كله
الاكل تجربه اجتماعيه خليها ممتعه
38. من الطبيعي ان ما ياكل الطفل وجبه و ياكل و يعوض بباقي الوجبات
ماكو شي اسمه أجبره
الطعام اختيار مو إجبار
39. الاستثمار الوحيد الناجح بالطفل هو تعليمه
40. الطفل يضحك و يناغي بالاربعين
ينظرلك بالشهرين
يرفع راسه و اعلى صدره اذا وضع على بطنه بال ٣ أشهر
يتقلب بال ٤ أشهر إلى ٦ أشهر
يستند على ساقه من عمر ٤ إلى ٨ أشهر
ياخذ كلشي لفمه بعمر ٦ أشهر
و يجلس منفردا بعمر ٩ أشهر
و يوقف بعمر ١٢ إلى ١٣ شهر
و يمشي بعمر ٩ إلى ١٨ شهر
و يكول اول كلمه بالسنه
اخر شي
الأم الفاشله هي الأم اللي تقارن
الأم الناجحه هي اللي تعد الطفل للمستقبل و تحجي وياه و تبعده عن التلفزيون
الأم الناجحه هي اللي ما تكول مو ماعندي وكت اله و اخليه على التلفزيون
الاب الحريص هو اللي يبعد أطفاله عن الجبس و الحلويات و العصير
الاب الجيد هو اللي يحير بتعليم أطفاله و الحصول على افضل الدرجات و افضل تعليم ممكن
دمتم بود
د. سيف سمير البياتي اخصائي طب الاطفال
from د. سيف سمير البياتي