قبل ساعات مر يوم البنات العالمي
ما لحكت اكتب بالمناسبه
يوم البنات العالمي هو يوم خصصته الامم المتحده للتذكير ببناتنا
بناتنا امهات الغد و مستقبل البلد الباسم
بناتنا اللي نهتم بيهن و نداريهن و نخاف عليهن
بس هل هذا هو حقهم؟
ابدا لا
خليني اختصرلكم حق البنات بينا احنا الامهات و الاباء و بالاخص و كوني اب اكتب هالمره من اب للاباء
❤ البنيه ما تريدك بس تصرف عليها
تريدك تدعمها
فهمها انه انت بجانبها
حتى لو هي خطا
فهمها انه انت تدعم قرارها
و بالاخص الاباء اللي صار عدهم بنات مراهقات
❤ لا تخليها تخاف منك
خليها صديقتك
و انت الام لا تخليها تخاف من ابوها
خليها تحجيله مثل ما تحجيلك
❤ فهمها انه مهما اخطئت فانت معها و مع خياراتها
لا تستهزء بيها و لا تقلل شانها
❤ انت روح البيت انت القائد
انت اول حب بحياتها
كن الها قدوه
راح تحفظ شنو سويت انت وياها
و راح تختار شريك حياتها يكون مثلك قدوه
❤ اقضي وقتك وياها
تحب الاغاني جيبلها البومها المفضل
تحب الرسم ارسم وياها
شجعها
❤ علاقتك انت بامها هي مثال لعلاقتها بزوجها بالمستقبل فلا تقلل من احترام امها حتى لا تعتاد تعيش ببيت الزوج مقلل احترامها
خلي زوجتك عزيزه كدامها مهما اختلفتوا حتى تنطيها فكره عن الزواج الصحي و كيف وضعها هي ببيت زوجها
❤ لا تستعجل بتزوجيهن انتظر
فمضاعفات الحمل و الولاده هي السبب الرئيسي بالوفاة في عمر ١٥ الى ١٩ سنة
وياها اكيد زياده بخطر الوفاه لمواليد هذه الفئه من الاعمار
لذلك انتظر
بالاخير من اب ل 3 بنات اكول لكل بناتنا و بناتي بيكم نبني جيل طيب الاعراق يعرف يناقش و يعرف الديمقراطيه و يعرف كيف يبني وطن
د. سيف سمير البياتي اخصائي طب الاطفال
