لا للاكل المبكر قبل ١٢٠ يوم
و لا لتاخير الاكل بعد الشهر السابع او الثامن
إهمال التغذيه الصحيه للاطفال جريمه بحق الطفوله
و الاكثر جرما هو عدم ادخال الاكل و الاهتمام فقط بالحليب بعد سنتين او ٣ سنوات و الطفل توصل نسبه دمه لل ٦ او ال ٧ بسبب نظريه ان الحليب زين
الحليب زين بس مو اكثر من مرتين
الحليب زين بس مو مميه بعد عمر السنه
الحليب مرتين فقط من عمر السنه مو اكثر
راح اكتب بتفصيل ممل هنا عن الاكلات اللي تخص اطفالنا :
⚽️ قبل كانت منظمه الصحه العالميه تكول الاكل لازم من عمر ٦ اشهر
بس بعدها العديد من المنظمات الدولية كامت تكتب انه الاكل من ٤ اشهر ( ١٢٠ يوم ) او ١٧ اسبوع
بس بشروط و اولها استعداد الطفل للاكل
و انه الطفل ضاعف وزن الولاده
و بدا يسيطر على راسه
و بدا يرفع صدره و اعلى راسه من ينام على بطنه
✔⚛⚛طيب اول ٤ اشهر شنو انطي ؟
رضاعه طبيعيه فقط
او حليب صناعي رقم ١
لا مي و لا عصير و لا تذويق و لا كلشي
الحليب فقط
♻️⚕♻️بالاربع اشهر شنو اسوي؟
اولا تاكدي من وجود علامات الاستعداد للطعام
و ابدي بالحبوب المنفردة
مثل الرز
او الشوفان
وياها خضروات بسيطه تنضاف
و الافضل تنخلط ويه حليبك او حليب القواطي
بعدها اي ضيفي الخضروات المهروسة أو سهلة المضغ بعد غسلها جيداً مثل ( الاڤوكادو – الشجر – الجزر- الباذلاء- البطاطس) وذلك عن طريق سلقها ثم هرسها في الخلاط حتى تصبح سهله القوام لطفلك و ضيفي حليبك او حليب القواطي
اكو راي لاكثر من طبيب انه يعتبر اللحم من اول الوجبات اللي ضروريه للطفل
فماكو اي مانع من انه تضيفين قطعه دجاج او لحم صافي خالي من الدهن للبيوريه الفوك
كملنا الخضروات و الف عافيه
بنفس الطريقة اللي كتبتها ضيفي الفواكه المهروسة أو سهلة المضغ بعد غسلها جيداً مثل ( الموز – التفاح – المشمش – الكمثرى) عن طريق سلقها و هرسها في الخلاط حتى تصير طرية بما فيه الكفاية
و عادي ضيفي حليب الها
🚯🛄🤔بعمر ٦ اشهر الى ٨ اشهر
هنا لازم لازم لازم قطع دجاج او لحم تفوت لمعده الطفل و هذا من اول الدروس اللي تعلمناها بكليه الطب قبل سنين
الحديد ضروري جدا بعد ال ٤ شهور و
لا تنسين وقت البقوليات و بالاخص العدس و الفاصوليات الحمراء و البيضاء وقتها الان لان نريد حديد و بروتين
بعمر ٦ اشهر ممكن اضافه البيض و الافضل الصفار بعده البياض بكم يوم الا اذا عدكم تحسس من البيض
لا ننسى ناجل الحنطه الى عمر ٦ اشهر و هسه نكدر نضيف بسكت الاطفال
⚛⚠️☑بعمر ٨ الى ١٠ اشهر
جا وقت الجبن
اذا كنت خايفه من البيض فالان وقته
المعكرونه من احسن الخيارات للطعام
علميه ياكل الخضروات و الفواكه كما هي بدون تحضير و خليه يلعب بيها
🚯☣✴من ١٠ الى ١٢ شهر ؟
كلشي وكلي من اكل البيت
بس لا ننسى ما نفضل ملح عالي بالاطفال باي عمر
و ما نفضل البهارات باول سنه الا نوعيات محدده
و يبقى العصير ممنوع لاول سنه من العمر
❎و بعد السنه تذكري
كلما العصير اقل كلما احسن حتى نستفاد من الالياف
نخلي ٥٠٠ خط تحت الجملة الجاية (( لا للكرزات لان ممكن الطفل بسهوله يختنق بيها
لا للكرزات باول سنه او سنتين او حتى ٣ سنوات اذا ما مستعد ))) الا باشرافك
✡اي فيتامينات معينه ؟
بس فيتامين دي لابو الرضاعه الطبيعيه و نترك خيار اضافه فيتامين دي للاطفال اللي يرضعون صناعي من قبل الطبيب و من بعد ما يفحصهم
⚛و الحديد؟
نفس فيتامين دي
فقط لابو الرضاعه الطبيعيه بعمر ٤ اشهر
لا تنسين ابدا امي اختي تزيدين الأكلات الغنية بالحديد مثل لحبوب القمح والعدس والسبانخ وصفار البيض واللحوم
📛و كالعاده راح تطلبون فيتامينات؟
فاكول ماكو داعي
اكل متوازن كلش كافي
⚛شنو ممنوع تحت سنه؟
الشكر و الملح و العصير و العسل و الدهون المشبعه
🤔شون اعرف صار تحسس ؟
شوفي انت ما تضيفين اكله ثانيه الا بعد ما تتاكدين انه الاكل الاول اموره تمام
و اعراض التحسس واضحه اسهال او مخاط او دم في الخروج او مغص او قيء او احيانا طفح جلدي فهذه حساسيه
🚯أضافه اخرى ؟
الحليب بعد عمر السنه مرتين باليوم و بالكوب
دمتم سالمين
د. سيف سمير البياتي
اخصائي طب الاطفال
from د. سيف سمير البياتي