من تريد تعزز ثقه اولادك بأنفسهم انه تخليهم يثقون بقدراتهم و يسوون الاشياء لوحدهم
ابدوا من البدايه كلش
من الكعده
من المشي
من الوقوف على الكراسي
من يبدون ياكلون
تحجي صدك دكتور مو هالثخوون؟
اي نعم من البدايه جدا
من شب على شيء شاب عليه
هو هذا غرض التربيه اعداد شخص معتمد على نفسه
علموهم الشي بالبدايه
و بعدين راقبوهم
اكيد مو مبرر للاهمال
بس اتركوهم بعض الشيء
اي عادي ما راح يدبروها بالبدايه
عادي ما هي كل البدايات صعبه !!
ما نمشي من اول محاوله
و ما نعرف نسوق سياره من اول ما نصعدها
خليه يحقق الانجاز وحده
راح تفرحه ثق
دكتور مو يوكع
اي عادي يوكع يتعلم يرجع يوكف
دكتور مو يوسخ ملابسه !
اي عادي اكو غسالات
احنا دا نحضر للمستقبل
علموهم يفرشون اسنانهم
علموهم شون يغسلون ايديهم
علموهم يلبسون ملابسهم
علموهم يعلقون ملابسهم او يرتبوها
بلا هالخوف الزايد اللي ماله ٦٠٠ داعي
من افحص الطفل اني اكولها للام اكعدي اني احجي ويه الطفل خصوصا الكبار فوك ٣ سنين
الطفل كلش يحب هيجي شي
و اغلب الاطفال يحبون هالشي لان اتعامل وياهم ككبار
احب الشقي و اللي يخربط و يبعثر
هو هذا اللي راح يتعلم
اني كنت شقي
و كانوا اهلي يتركوني اخذ راحتي
كلشي كنت اكسره
ازرعوا بداخلهم انه اني اكدر اني اعرف
مو تزرعون داخلهم الخوف
د. سيف سمير البياتي
اخصائي طب الاطفال
