وين أفضل نومه للطفل ؟
بين امه و ابوه او مجاور امه او بسرير منفصل ؟
موضوع نومه الطفل و استقلاله عن والدته بسرير منفصل موضوع جدلي و قديم
بس حمايه الاطفال اولويه طبعا
الجمعيه الامريكيه لطب الأطفال تكول انه الطفل لازم ينام وحده بسرير منفصل علمود متلازمه موت المهد
يعني بين قوسين يخافون لا تنامين انت او ابو الطفل على الطفل و يختنق
بالمقابل اكو اشياء تشجع على نوم الطفل بنفس سرير الأم و هي الرضاعه الطبيعيه لان تصير اسهل
اكيد نوم الطفل مع امه يسهل عليها المهمه و تنام اكثر
باختصارشنو فوائد و مساويء النوم مع الاهل ؟
نبدي بالفوائد
1. ساعات نوم اكثر اذا كانت ترضع طبيعي
2. سهوله بالنوم لان الطفل يفضل ينام بحضن احد من اهله
3. يساعد على تنظيم درجه حراره جسم الطفل بالاجواء البارده
و نروح للمساؤي :
1. النوم مع الاهل ما راح يعلم الطفل على استقلالية النوم و بالتالي يصير معتمد كليا عليم بتنظيم النوم
2. يؤثر نوم الطفل على نوم الاهل و راحتهم فمعروف ان الاطفال يتحركون كثيرا بالنوم و ممكن يدفعون او يضربون اللي بجانبهم
3. للاطفال الاصغر عمرا من سنه فيزيد احتماليه حدوث متلازمه موت الرضيع
لذلك تعليم الطفل على النوم المستقل شي مو كمالي و إنما من ضروريات النوم الأمن لكل طفل بالأخص لاعمار اقل من عمر سنه
د. سيف سمير البياتي اخصائي طب الاطفال
from د. سيف سمير البياتي