و برد الجو و درجات الحراره بدت تقترب من الصفر او اكثر بقليل
و تذكرت ايام بارده كنت اسهر بيها بالمستشفى بين الاطفال و اتذكر كل ام تكعد بنص الليل علمود ابنها صحى من النوم و هي متلحفه ببطانيه
و تذكرت زوجتي شون تسهر حتى ترضع الاطفال او من يتمرضون و تكولي ( روح نام وراك دوام ) و هي اصلا وراها دوام
تذكرت امي كيف سهرت و هي تكبرني و اني مريض و اني جوعان بنص ليالي البرد
تذكرت كل ام تريد تنام ساعتين على بعض متواصله
البرد ذكرني بالمغص بالاوقات العصيبه بالسهر بالتعب اللي كل الأمهات تقدمه
كل الأمهات تقدم شي ماله مثيل
الأم تقدم احلى ايام عمرها لاولادها
اي صح ايام و تمر و تعدي
و يقل سهرك و تعبك و تنامين و تشبعين نوم
بس تبقى هذه التفاصيل و السهر و التعب داخل قلبك للأبد
اعرف ان المهمه صعبه
بس راح تتميها على أكمل وجه
الله يعينك على التعب
دمتم يا امهاتنا بكل سلام و ود
د. سيف سمير البياتي اخصائي طب الاطفال
from د. سيف سمير البياتي