قريبا جدا الذكرى الرابعه لبدايه الصفحه
و لكل المتابعين الجدد اللي ما يعرفون قصه بدايه الصفحه نحجيها
❤ القصه بدت انه اني اكتب بكروب طبي خاص بالمجموعه الطبيه بعض البوستات عن الاطفال و امراض الاطفال
❤ زميله اقترحت انه اسوي صفحه اكتب بيها عن الاطفال و رعايتهم و الاهتمام بيهم لان اني احب التفاصيل و هاي الأشياء اللي اكتبها الكم بروح الاب الطبيب و حتى تنجمع كل بوستاتي بمكان واحد هو صفحه فيسبوك وحده
❤ عجبتني الفكره و بديت اكتب و نزلت اول بوست و انطلقت اكتب و اكتب و اكتب
❤ البوستات انطلقن وياها عدد المتابعين من غير المجموعه الطبيه بدا يزيد و وصلنا لل ١٠٠ الف و ٢٠٠ الف و ٥٠٠ الف و هسه كاعد نقترب من المليون لوما الحظر اللي فرضه فيسبوك بسبب منشورات للصفحه عن الكورونا كان وصلنا للمليون لايك قريبا
❤ الطموح الاول كان 100 الف و راح نوصل للمليون متابع بجهودكم طبعا
❤ الصفحه ما بيها عنوان عياده ليش ؟
بالبدايه كان بيها بس بعدين شفت ناس تتعب علمود تجيني علمود بوست او فكره فرفعت العنوان من الصفحه لان مو هذا ابدا هدف الصفحه لا من الاساس و لا بعدين
و اكثر شي افتخر بيه هو انه اني طبيب منطقتي مع اعتزازي بكل اللي يجوني من خارجها بس بمناطقكم اكو اطباء احسن مني بهوايه
❤ هدف الصفحه كان كما كتبت
و اصبح لنشر المعرفه بين الناس
❤ الصفحه بعيده كل البعد عن التجاره و الاعلانات
❤ شون تدبر وقتك للصفحه ويه العياده و البيت ؟
الجدوله ببساطه
كلشي مجدول
اكتبه من ايام بعيده
حتى هذا البوست مجدول قبل اسبوعين
❤ ليش الصفحه ما بيها صورتي الشخصيه ؟
لانها ببساطه صورتي الشخصيه
احب جدا احافظ على خصوصيتي و حتى لا يفسر الموضوع انه الصفحه لاجل الطشه بمصطلحات بعد الالفين
و لا اني اللي ادورها
اني طبيب معروف بمنطقتي قبل الصفحه بكومه
الصفحه لله و راح تبقى لله
❤ هل انت الوحيد المتحكم بالصفحه ؟
بالبدايه اي و لحد سنتين تقريبا
و بعدين ضفت د. سلمان داود مقيم اقدم اطفال
و دكتورة همسة طبيبة اسنان
و دكتورة اسماء طبيبه اسنان
و دكتور مخلد الفضلي طبيب نفسي
و دكتور سوران من كردستان طبيب باطنيه
دكتورة زينة البياتي تحجيلكم عن الريجيم و الدايت
و آخر طبيبه هي دكتورة رحاب مجيد طبيبه نسائية من الطراز الاول
اكو بعد ادمنيه اثنين من غير الاطباء للمراقبه اللصيقه للصفحه
❤ احجيلنا عن نفسك ؟
طبيب اطفال شغوف احب طب الاطفال من وقت كليه الطب و مقرر اكون طبيب اطفال من البدايه
الاول على البورد لسنه 2014
الانجاز اللي يحقلي افتخر بيه
❤ ليش نجحت الصفحه من دون كل الصفحات ؟
اتصور ان سر نجاحها هو احساسكم بصدقها وصدق الي ديكتبون بيها انه يوصلون المعلومه مو لاجل مجرد اثاره تساؤلات ولا لمجرد الي يريد تفاصيل خل يدفع وانما تنقل المعلومه كامله ، وزكاة العلم نشره وياريت تنشروه ويانا ، وعدنا ايمان حقيقي. , ان الصفحه داخله للكثير من البيوت ، ودخولها هو باحداث تغيير حقيقي داخلها، وبالتالي أحداث تغيير حقيقي في المجتمع حتى يكون مجتمع يصلح للمعايشه لاجيالنا القادمه، ربما احنا حنموت ومانشوف شي
بس عدنا ايمان ، الاجيال القادمه حتكون افضل … وان شاء الله نكون ساهمنا بجزء من هذا الشي
د. سيف سمير البياتي اخصائي طب الاطفال
from د. سيف سمير البياتي