دكتور عمره سنه و اكرع
عمرها سنتين و بعدها ما عدها شعر
دكتور عمره ٦ اشهر و الكه المخده ( الوساده ) كلها شعر
القشره ماليه شعره و صايره طبقات شاسوي ؟
التساقط راح يموتني شاسوي
نبدي بالنقاط تباعا
❤ كل او اغلب شعر الولاده يوكع و يتبدل هو هذا العادي و البديل اقوى من الشعر اللي طلع و هو برحمك
❤ طبيعي جدا انه الطفل يكون اكرع بعمر سنه
❤ طبقات القشره اسمها قبعه المهد و هي عاديه و حميده و ما تحتاج شي
بس اذا ضايجه منها ممكن استخدام زيت جوز الهند و تركه ليله كامله و بعدين يتغسل ثاني يوم
ممكن زيت الزيتون و لو ما افضله
ممكن زيت خاص لماركات تجاريه معروفه مصممه لهذا الغرض و النتائج جيده
تكدرين تكررين العمليه مره او مرتين اسبوعيا على حسب كثافه القشره
❤ تنتهي القشره بنهايه السنه الاولى و ممكن عادي تستمر الى سنتين بكل الحالات هي ما تخوف
❤ ماكو شنو نوعيه صابون او شامبو افضل شي هو الخالي من الكيمياوات و عن نفسي اكتب و اشتري الرغوات لان اامن و اقل كيمياوات
❤ الشامبو اذا ما اشتريتي الرغوه اختاري مال اطفال
❤ الصيف اللي مضى شفت تساقط اكثر من كل موسم و السبب ؟
كثر الغسل
الغسل مرتان او ٣ مرات اسبوعيا
و مره بشامبو و مره بدون
❤ اهم اشاعه احاربها هي زينيه لشعرها يطلع اثخن فالقص ما ياثر و لا راح ياثر لان الموضوع عدد بصيلات مو طول الشعر
التجارب الشخصيه مالها علاقه بالموضوع و المنظر اللي حصلته انه ثخن بعد القص مجرد ان الشعر قواعده عريضه بينت اكثر لذلك تحسه اثخن و الا ماكو هيجي شي
❤ الشعر الكيرلي او المجعد تكدرين تستخدمين بلسم للشعر بس مو اكثر من مره اسبوعيا
❤ زيوت الشعر للي يحب يستخدمها ليش لا
بس مو اكثر من مرتين اسبوعيا
❤ بعد الحمام نحاول ما نمشط الشعر و ننتظره ينشف شويه بدون عنف و تعذيب للشعر و بعدين نكول هاي ليش يتساقط
من العنف عيوني
من العنف بالتمشيط عزيزتي
❤ احسن انواع المشط هي اللي تكون بيه مسافات كبيره بين اسنانه
❤ للرضع استخدمي فرشاه رقيقه
❤ التسريحات و التمشيط مو كل مره بنفس الشكل فغيري التسريحه و الهيئه و غيري طريقه التمشيط لا دائما باتجاه واحد
❤ التصفيف يبدي من الاطراف مو من المركز حتى لا نسحب هوايه بالشعر
❤ بمكان قص الشعر و تخلين الطفله المسكينه منظرها ما حلو لاجل لا شي
قصي اطراف الشعر المتقصفه
❤ الماء اللي نغسل بيه الشعر لازم يكون دافي
❤ لا تبقين الطفله ٢٤ ساعه و ٧ ايام و ٥٢ اسبوع هي و قراصتها قللي التصفيف لشعرها
❤ لا تسحبين شعر الطفله بالقراصات و بعدين تكولين هاي ليش يتساقط
موضوع التساقط الناتج عن سحب الشعر حقيقي و دا نشوفه بكثره
❤ راس الطفله مو معرض الصاله قراصه او ٢ تفي بالغرض بلا حركات السيرك و كثر القراصات و المشدات
❤ اللي تستخدم حنه و صبغ لشعر طفلتها تعليق واحد بس( الله يسامحك)
❤ التسريحات البسيطه هي مو بس الاجمل هي الافضل لشعر طفلتك
❤ غيري التسريحات و طريقه السحب بكل مره
❤ الضفيره لا ٢٤ ساعه تذكري دائما ان الشعر جزء حي من جسمنا يحب يتنفس
❤ مجفف الشعر لا دائما على التدفئه فقط استخدمي الهواء بدرجه الحراره العاديه
❤ صحه شعرك تجي من صحه جسمك فطعام صحي و شراب صحي اكيد راح يؤدي الى شعر صحي
❤ خلي شعرهم يتنفس دائما تذكري هذه الجمله و فكي القراصات و الباندات و مواسك الشعر
خلي شعرهم حر
د. سيف سمير البياتي اخصائي طب الاطفال
from د. سيف سمير البياتي