هذا البوست الطويل هو عن آخر أيام الصيف و قبل الشتاء ننطي فرصه اخيره للتعليم الاطفال عن استخدام التواليت
الجزء الاول:
العمر الطبيعي هو من سنتين إلى 3 سنوات
و اكو اطفال أبكر من هيجي وكت يتعلمون
نبدي خطوه بخطوه
.
.
.
18 شهر
1.علمه الكلمات الاساسيه ( التواليت أو عندي ادرار أو غيرها)
2. فهمه انه الكل يروح للتواليت علمود يقضي الحاجه
3. من تشوف حيوانه المفضل يتدرر فهمه انه شنو دا يصير
4. أمدح طفلك في حال قضى حاجته بالحفاظه
5. ابدأ لا توصف اللي بالحفاظه بأوصاف مرعبه
6. عمليه تغيير الحفاظه لابد تكون ممتعه و مو مزعجه
7. غيري حفاظاته هوايه بحيث دائما يكون جاف
8. علميه يجيك كلما حس على روحه رطب أو مو نظيف
.
.
.
21 شهر :
فهمي طفلك عن هو شنو التواليت و ارمي محتويات الحفاظه بالتواليت كدامه
2. إذا عنده أخ أكبر خليه يشوفه شون يستعمل التواليت يكون جدا احسن و خليه يستخدم التواليت كدامه
3. انطيه كرسي التواليت و خليه يكعد على الكرسي و هو لابس ملابسه علمود اللعب
4. تكدر تدخل للتواليت و تدخلين ابنك للتواليت وياك و تكعده ع كرسي التواليت و هم للعب
.
.
.
.
عمر سنتين:
1. ابدي استخدم الفيديوات اللي موجوده ع اليوتيوب و شوفيها انت وياه
2. ساعديه بالتمثيل انه دا يبول لعابه
و إذا أمورك الماديه جيده تكدرين اشتريله لعابه تقضي الحاجه و هو خليه يدررها
3. خليه يلبس ملابس داخلية بصوره دائميه
الجزء الثاني
#التواليت
نكمل المقطع رقم 2 عن موضوع التواليت
من تختار القعاده اختار اللي تطخ بالكاع و يكون مستواها بالكاع بحيث رجليه تستند بالكاع
ماكو داعي اللي تكون بشكل كرسي
و مثل ما كلنا خليه يكعد عليها و يأكل عليها و يشوف تلفزيون و هو كاعد عليها و لابس ملابسه
و خليها بغرفه العابه
و ابدا لا تبدي تعليم تواليت و هو كاره الموضوع و كاره موضوع التواليت
#تواليت
الجزء الثالث
من بعد ما صار طفلك مستعد مثل ما شرحنا بالبوستات الاثنين السابقه اجه وقت التحويل شجعه لعمل التالي:
1. شجعه انه يركض للتواليت بدون حفاظه مثلا تكوله يلا روح تدرر أو يلا خلي نروح
بس حاول تكوله من طفلك مبين راح يسويها أو على وشك يسويها مثل يلمس الحفاظه أو يبدي يلزم بطنه أو غيرها من العلامات
و إذا ما تعرف شون تقرأ علامات وجهه حاول وره اغفاءاته القصيره
2. إذا يرفض طفلك الكعده على القعاده حاولي تحجيله قصه مقابل الكعده
و إذا وره دقيقه حب يكوم منها لا تنهريه و لا تمنعيه
ابدا لا تستخدمين القوه بإجبار طفلك على الكعده
زين و إذا ابنك مستمتع بالكعده؟
ما انصح ابدا يكعد أكثر من 5 دقايق بالمره الوحده حتى لو كان عاجبه
3. أول أيام خلي القعاده بالغرفه اللي يلعب بيها و بعدها حولها للتواليت و يفضل شراء اثنين حتى وحده بالتواليت و وحده بالغرفه
4. ملابسه لازم تكون مريحه جدا و ما تصعب عليه استخدام القعاده مثلا و دائما خليه حافي و بالشتاء شويه زيدي الحراره
5. من تنجح المهمه أمدحه مثلا عفيه صرت كبير و لا تنسى الهدايا و ضم الهديه الكبيره اذا راح وحده بلا ما تكوله
6. إذا بالخطا و سواها على روحه
بدلي ملابسه بسرعه و كوليله ( اني ادري انت دا تروح للقعاده بس انت سويتها على روحك و انت تفضل تبقى نظيف و حلو فاكيد مره الجايه تروح للقعاده)
أو تكوله شفت فلان ( طفل أكبر منه يحبه) تعلم على التواليت و أبد ما يسويها على روحه
7. آخر نقطه من بعد ما تعلم ع التواليت رأسا علمه يلبس ملابس داخلية
يعني من تشيل الحفاظه بدلها بالملابس الداخلية
طبعا أفضل انه تشتري الملابس الداخلية من بعد 10 مرات ناجحه لاستخدام القعاده و خلي شرائك للملابس الداخليه كهدية لأن هو كبر و راح تشتريله
و لا تنسى تاخذه وياك حتى يختار هذه الملابس الداخلية و على ذوقه
د. سيف سمير البياتي اخصائي طب الاطفال
from د. سيف سمير البياتي