خلي احجيلكم طبيا
التشنج العضلي علاجه المساج ومسكنات الالام
التمزق العضلي علاجه الراحة وعدم الحركة
الخلع علاجه طبيب كسور او مفاصل يعيد المفصل لمكانه بحركات طبية مخصصة
المتن او الممتون الناس تؤمن انه المفصل انخلع من مكانه وهالشيء طبيا لازم طبيب يرجع لمكانه لان مو بسهولة يرجعه
لذلك ما اعتقد الممتون كتفه مخلوع لان دتكولون بالمساج يسكت
الي ديصير بالطفل ويخليه بس يبجي
طبيا اما مغص معوي والمغص يرتاحون عالمساج أصلا
او الطفل متاذي كتفه لكن ما مخلوع في حال مأذيه بالشيل ويرتاح عالمساج
وهالمساج اي شخص يكدر يسويه
مو الا عرافة
اليوم تروح للعرافة على متن باجر تروحلها على سگوة
انزلوا الناس منازلهم
العرافة مو طبيبة، لا تشجعوها على التدخل بعلاج اطفالكم
تشجيعكم يخليها تتجرأ وتنطي سگوة لغير طفل
اليوم اجانا طفل داهنيه بمواد ماعرف شنو علساس ممتون والطفل يبجي لان عنده تسمم دم جرثومي مو متن
فإذا تروجون لثقافة المتن و العرافة
اي طفل يبجي زايد ( الي عنده التهاب السحايا، الي عنده مغص، الي عنده تسمم دم)
اهله راح يظنون ممتون و يتأخرون بجلبه للمستشفى و خطيته راح تكون برقبة كل من يشجع على مراجعة العرافات ويشخص بكيفه
وتذكروا انه ما يلفظ من قول الا لديه رقيب عتيد
تعليقك الي يوم تكتبه وبسببه طفل يصير ضحية
راح يحاسبك عليه رب العالمين يوم القيامة
العلم اولا ، ثم العلم ثم العلم
اما العادات والتقاليد و سوالف امهاتنا و جداتنا ، نحترمها ونقدرها لكن نستشير طبيب قبل لا نسوي شي منها
حتى لا نخسر تعب ٩ اشهر وانتظار السنين بغلطة ما ننساها طول العمر
د سلمان داود
مقيم اقدم اطفال
from د. سيف سمير البياتي