قبل موجة فيتامين دي
و اللي كلش اؤمن بدور فيتامين دي الوقائي و خصوصا بالاطفال الرضع
كان اكو موجه عن الزنك و دوره الوقائي بالمناعة و اهميته لتعزيز المناعه
فهل هو فعلا مهم لهذه الدرجه؟
خليني اكشفلكم الحقائق
الزنك واحد من العناصر المهمه
الزنك يدخل بتركيب اغلب انزيمات الجسم
تقريبا ١٠٠ انزيم موجود بيها هذا العنصر
حتى بمقال من الصحه العالميه صدر بال ٢٠١٩ يتوقع انه للزنك دور مهم بالنسبة للطول للاعمار تحت ٥ سنين
و انه نقص الزنك واحد من الاسباب اللي تاثر على الطول
الزنك صديق الجلديه و نظام المناعه و السبب لان يساعد على التئام الجروح و يعزز النظام المناعي
شون يعزز المناعه ؟
حسب المجله الاوربيه للمناعه تكول بيها انه الزنك يعزز الخلايا من نوع T cells اللي هي الخلايا اللي تنظم كل جهاز المناعه و هي المسؤوله عن مهاجمه الخلايا الغير طبيعيه و الخلايا اللي بيها التهابات
الزنك و دوره جدا واضح في معالجه الاسهال و يقلل الفتره بالنسبه للاسهال و هذا مثبت باكثر من دراسه من بنغلادش
حتى بالنشله ( السعال و الرشح ) دراسه ممتعه اخرى تكول انه يساعد على تقليل فتره الرشح بالكبار
الزنك يساعد بالتئام الجروح حسب دراسه سويديه
و انه نقص الزنك ممكن و بشده يؤثر على التئام الجروح
حتى على الصحه الانجابية للذكور ممكن يؤثر النقص و من يتعالج يزيد من نسبه الحيامن
طيب منين ناخذ الزنك ؟
الزنك اللي نحتاجه كمياته كلش كلش قليله
بس بنفس الوقت هو موجود بكميات قليله في بعض الاغذية و من اهمها
البقوليات و السمك و اغلب الاكل البحري
موجود بكميات لا باس بها في اللحم
اما اعلى الاكلات بالزنك فهي المحار
بعدها لحم الخروف
بعدها البقوليات
من بعدها الرز الاسمر
اللبن مصدر جيد للزنك
هذه هي مصادر الزنك الطبيعيه
بس موجود اكيد على شكل حبوب و فيتامينات و شرابات
.
.
اكدر اخذ زنك و افضها ؟
بصراحه ما انصح
صحيح الزنك مفيد و رائع
بس كثرته مو خاليه ابدا من المشاكل الاخرى
مثل القيء و الغثيان و ممكن يسبب صداع
و اللي هو مثل ما كلت علاج للاسهال
ممكن اصلا زيادته تسوي اسهال
لذلك لا ننسى انه ناخذ الجرع القليله و مو كل جرعه كبيره معناها زينه الامور
د. سيف سمير البياتي
اخصائي طب الاطفال
from د. سيف سمير البياتي