#التربية
احسن شي ممكن تعلمي لطفلج من اول ايام هو الدفاع عن نفسه وعدم تقبل الاهانه
شلون؟
اي شخص يحجي عليه كلام سلبي ، ردي
اي والله ردي
حتى لو ديتشاقة
ردي ، هم بالشقة
المهم جاوبي ولاتسكتين
ولا تكولين اي والله صدك!
طبعا نحجي مثال حته تتوضح الصورة
🙃هاي شنو بنتج زركه؟ عليمن طالعة
😉تخبل زركة لو خضره لو وردية حلوة وتخبل 🥰
🙃هاي شنو ابنج شكدوتة عبالك قزم
😉شحلو طولة حبيبي اسم الله عليه 😁
🙃وكيح كلش ابنج بس يتحرك شنو هذاااا
😉لا مو وكيح حلو وحباب الله يحفظه
🙃 هاي شنو شو ابنج ضعيف
😉 شبيه الضعيف احسن من السمين و اكيد ما اسمنه لان ما ناويه اذبحه ع العيد
تدرون هيج شي رغم بسيط شكد تاثيرة جبير؟
طبعا عن تجربة شخصية رغم ما احب اكتب تجاربي حتى لايتحول الموضوع
لكن حته تعرفون عمق هذا الشي
ابني حاليا اي شخص يوجه له كلام سلبي، يرفضه ويدافع راسا عن نفسه
وحته عن اخته
وميتررد ولا يستحي ولا يخجل
لان يشوفه هو هذا الشي الطبيعي ، من اول مافتح عينه على الدنيا ،
من يكلوله وكيح محلو
يكلهم لا اني حلو وعاقل
من يكولون لاخته وكيحه بس تبجي، يكلهم لا خطيه صغيرة
وهذا الشي كلما تعززوه اكثر ، كل يوم كلما يرسخ اكثر
وميصير ملطشه للرايح والجاي
مع الاخذ بنظر الاعتبار ، هو متجاوز ولا قلل احترام، يتكلم بعقلانية وادب … ويخلي الي حجه غلط هو يخجل من نفسه 🥰
#ازرع_الثقة
د.اسماء اسماعيل البدري
from د. سيف سمير البياتي