نرجع نكتب عالانفلونزا بالحمل لان الحوامل اغلبهم الي ديجون بسبب الانفلاونزا وقلقين وتعبانين
اولا لازم نعرف انه الحمل بحد ذاته واحد من العوامل المهمة في تقليل المناعة يعني اسهل ان تصاب بالامراض المعدية من الشخص العادي اذن لازم ننتبه ونحاول نحمي روحنا🙏🏼
لقاح الانفلانزا امن بالحمل الي تريد تاخذ والي تريد لتاخذ براحتكم بس هو امن مابي شي
نخفف من الطلعات الي مالها داعي ومو ضرورية شكد منكدر وخصوصا المناطق المزدحمة
نتجنب التماس مع اطفال او كبار مصابين بالانفلاونزا
من نطلع نلبس الكمامة لطفا👍🏻
نتجنب التدفئة المركزية بالبيت ( السبلت ) لان التدفئة هذي جافة وتزيد الاحتقان واكو شي متعرفو غالبا اكو انواع بكتريا ممكن تعيش بهذي الاماكن وتسبب انواع غير تقليدية من ذات الرئة الي مو شرط تكون جدا مؤذية بس تطول لما تتشخص وتتعالج
العلاجات المعروفة والي ممكن ناخذها اعيدها الكم
براسيتول جدا امن ممكن ناخذه كل ٨ ساعات يخفض الحرارة ويسكن الالم والصداع
محلول ملحي قطرات للانف اذا محتقن
فيتامين c حبوب او اقراص فوارة
شراب للسعال ممكن ناخذ سلفودين واذا اكو تحسس والحنجرة ناشفة ناخذ دكسون شراب
اضافة مضاد حيوي رح يكون باشراف الطبيب
ونرجع نذكر شوربة ومشروبات دافية شكد منكدر
ليمون وزنجبيل دافي جدا مفيد ونضيف عسل ويا هم يفيد ويزيد المناعة
سوائل شكد منكدر ناخذ
ملابس فضفاضة ومريحة لتلبسون هواية ابدا مو صحيح
فتامينات الحمل نبقى ناخذهم ومننساهم
الانفلاونزا بالحمل ممكن تؤثر اذا كانت الحرارة عالية ف الافضل ناخذ علاج احسن مما نبقى بالصخونة
اذا حسيتي تقلصات من الكحة او نزلت سوائل او قلت الحركة روحي لطبيبتج واتاكدي الامور تمام
اذا حرارتج عالية ومتنزل حتى ويا البراسيتول روحي لطبيبتج تضيف او تدز تحاليل تشوف شنو الاشكال
اذا ولادتج قريبة وصرتي فلاونزا روحي للطبيبة لان اي ولادة ممكن ان تحتاج تخدير اذا صارت قيصرية او مرات لما بعد الولادة علمود خياط او شي لاسامح الله
الانفلاونزا مزعجة ويا التخدير خصوصا اذا جان وياها التهاب بالرئة
بالسلامة والصحة دوم لحواملنا واطفالهم❤️
د رحاب مجيد شريف
from د. سيف سمير البياتي