مشي الاطفال
مرحله من مراحل التطور لكل الاطفال
بس ما يقلق هو هذا الاستعجال على المشي
المشي يمر بمراحل عده و اولها بالجلوس و بعدين الاتكاء على الاثاث و بعدها الوقوف منفردا بعدها عده خطوات و بالاخير يمشي
المشكله وين؟
المشكله لو حمودي ابن سناء مشى قبل عبودي ابن فخريه
و راسا رجل فخريه يروح يجيب ابره الكالسيوم المقدسه
يا ابو عبودي تعال اكولك فد شي
الاطفال ما تنزل من بطن امها تمشي
و اكو اطفال يمشون بعمر ١٠ اشهر و ٩ اشهر
و اكو عادي يمشون بعمر 18 شهر
محاوله الاخرين لتصوير اولادهم و كانما هم سوبر كيدز خلت هذا جو المقارنه بين العوائل و كانما نحن في سباق
المشي تطور و قابليه
مثل قابليته على الدراسه و الابداع و الاكل
اعرف كم نقطه مهمه
اولا البنات كمعدل يمشون قبل الاولاد
الحجله لا تساعد على المشي
ابره الكالسيوم اذا زادت عن حدها ممكن تؤدي الى حصى كليه و مشاكل في غنى عنها
و اكيد ما انسى حادثه التسمم اللي تعرضلها طفل بسبب فرط اعطاء الاهل لطفلهم من فيتامين دي و احتاج الى الكثير من العلاجات و دخول المستشفى
تريده يمشي
اسنده
علمه
لا تخليه بحجله
انطيه فيتامين دي اذا رضاعته طبيعي
اهتم بتغذيته
عرضه للشمس
و انطيه اكل صحي غني بالخضراوات و الفواكه و اللحوم
خليه مسنود على كرسي
و جيبله كرسي يدفعه او طاوله صغير يدفعها
لا تلبسه حذاء ( اجلكم الله )
خليه يزحف و يصعد على الدرج
حتى تتقوى عضلات بطنه .
.
.
.
شوكت اراجع اذا ما مشى ؟
١٨ شهر
و مثل ما دائما اكول ( اني مشيت و عمري سنه و ٣ اشهر )
دمتم بود
د. سيف سمير البياتي اخصائي طب الاطفال
from د. سيف سمير البياتي