الغيره
موضوع كاتب عنه مسبقا
بس هذه المره راح اكتب اكثر عنه
الموضوع يبدي من البدايه اول ما تصيرين حامل و الف مبروك
عرفيه انه اكو طفل دا يتكون
انه راح يجيه اخ او اخت
و لما يبدي يتحرك
خلي ايد طفلك على بطنك و كوليله بدا يسلم عليك و يحبك
ثاني شي دائما فهميه انه هذا هو الطبيعي مثل تشوفين قطط اثنين وضحي انه هذه القطه تمشي ويه اخوها او اختها
تشوفين صور لعائله كولي ذوله اخوان و هكذا
شاركي طفلك باختيار ملابس و اغراض الطفل الجديد و غرفته و فراشه
راح يحب هو هذا الشي
من طفلك الثاني يجي على الدنيا خلي هديه بجانبه لطفلك الاول و كوليله هذا اخوك او اختك جابها الك
بهيجي لقطه راح تكسب الكثير الكثير من الود
اشوف من العوائل و الناس اللي اعرفها
انه الطفل بعد ولاده الطفل الجديد يبدي ينعزل و يسوي شغلات كبر عليها
فاذا كان مفطوم يرجع يشرب مميه
و اذا كان مسيطر على الادرار يرجع يتدرر على روحه
اكو قسم ما يقبل يمشي الا ينشال و هكذا
و الكثير الكثير منهم يضرب اخوه الصغير باي شي او يقرصه
شنو تسوين هنا ؟
اولا اعرفي انه الموضوع كله لجذب انتباهك
ثانيا خلي يشاركك بالاهتمام بالطفل الجديد مثل يلا ماما جيب الحفاظ
ثالثا خليه يلاعبه و يضحكه و من يضحكله الطفل الصغير كوليله شوف يضحك لان يحبك و مره على مره يكون اكثر تحمسا
رابعا لا تهملين الطفل الكبير لاي سبب كان و ماكو اي مبرر لهذا الموضوع
كلنا نعرف الطفل الثاني اول ٣ اشهر متعب بس حق الطفل الاول محفوظ
فاهتمي بيه اكثر
و العبي وياه اكثر
الطفل الكبير ما راح يفهم ابدا انه انت تعبانه بالطفل الصغير
ما يكدر يستوعب يعني شنو تعب
خليك متوفره
خامسا لا و الف لا للمقارنه بالسلب او الايجاب
لا تكول انت احسن او اسؤا
خليهم اطفال عاديين هادئيين و بس
سادسا لحظات التوتر و العصبيه لازم تصير و يبدون يبجون لاي سبب او يرجعون يرضعون مميات او يرجع يتدرر على نفسه بعد ما كان مسيطر هذه لحظات تصير
لا تفوتين بحرب العناد
و الصياح و العياط
فتره و راح تعدي
انتظري فقط
سابعا اياك و اياك ترك الطفل الصغير بدون مراقبه مع الطفل الكبير
ممكن تصير كارثه بهذه اللحظه
بعيني شفت طفل دافع كلبس كهرباء بفم اخوه
و مره طفل دفع ملهيه بفم طفله
لذلك انتبهي بدل المره مليون
اخر نقطه من يقرص او يضرب اخوه فهميه خطا التصرف و اذا اكبر من سنتين عاقبيه
غير مبرر موضوع الضرب للاخ او الاخت الاصغر
خليك حديه جدا بالتعامل بهذا الموضوع حتى لا يتعود الطفل على مبدا الضرب
اعرف و الله الموضوع مو سهل
و اعرف انه احيانا تنهارين و تتعبين
بس صدكي اتبعي هذا البوست و راح تشوفين النتيجه
د. سيف سمير البياتي
اخصائي طب الاطفال
from د. سيف سمير البياتي