الاسقاطات المتكررة
٣ اسقاطات بعد بعض تعتبر اسقاطات متكررة
لو كان عمره اسبوع او ٣ اشهر فهو يقهر الام ياخذ جزء من قلبها وياه وابد مينسي وخصوصا اذا الام مدتحصل اطفال واذا اكو لوم من الطرف الاخر او الاهل او المجتمع الله يعينها
انتي وعندج هيج مشكلة تعاطفنا وياج كبير بس الموضوع محتاج صبر وطولة بال اعرف صعب بس نعمل بالاسباب
الاسباب👌🏽
✨جيني يعني خلل بالجنين اما بالبيضة او الحيوان المنوي او البيضة المخصبة يعني بعد مصار الجنين اتعرض لعوامل خلته ميكون شي طبيعي وبالتالي اغلب الي هيج شي يسقطون وميكملون ممكن يزيد الموضوع بزواج الاقارب وبالعمر للاب والام بس الام اكثر وبالتدخين والوراثة بالعائلة لامراض وراثية هذا يشكل جزء كبير من الاسقاطات المتكررة
✨زيادة عوامل التخثر بالدم سواء مرض بحد ذاته او جزءمن مرض كثل داء الذئب الاحمراري وهذي الحالة تشخيصها مو دائما واضح مختبريا وغالبا نعتمد عالتاريخ الطبي للمريض ونبدي علاجات تمنع الخثرة والتجلطات وتزيد احتمالية الحصول على طفل معافى
✨ داء السكري النوع الاول او الثاني او سكر الحمل لذلك ضروري نفحص السكر التراكمي وبالحمل نبدي جدول متابعة للسكر ونشوف طريقة صرف الاكل ومستوى السكر بعد الاكل وهوايه ناس استفادت من دايت الحمل بعد اسقاطات متكررة
✨خمول او زيادة بهرمونات الغدة الدرقية
✨تشوهات الرحم ووعنق الرحم لذلك بعض المريضات تحتاج ناظور رحمي لمعرفه نوع التشوه قبل الحمل مرة اخرى
✨اختلاف فصيلة الدم مو كلهم حالات خاصة فقط
✨الالتهابات المزمنة بانواع معينة من البكتريا يفضل علاجها لمنع الاسقاطات وخصوصا بعد الشهر الرابع
✨تكيس المبايض واحد من اهم الاسباب اما بسبب خلل الهرمونات ونقص البروجسترون الي نحتاجه لبداية الحمل او بسبب سكر الحمل الي تنصاب بي مريضة تكيس المبايض وبسبب السمنة كمسبب رئيسي لذلك احيانا نحتاج نبقي مريضة التكيس على مساعد السكر الكلوكوفاج
🌟كل هذي الاسباب علميا وعالميا هي اساس الاسقاطات المتكررة ف رجاء ورحمة للانسانية جمعاء عوفو تحليل الجرثومة وداء القطط والحصبة الالمانية ليش نحب الخطا ونكون مصرين عليه
هل من المعقول انه اكو مريضة تحتاج مضاد حيوي لمدة ٩ اشهر!!!! شبقى بالمناعة وشبقى بالكليتين يوميه تاخذ مضاد حيوي
اسمعو واسالو واقرو احدث الاشياء
دائما اشجعكم تنزلون تطبيقات الحمل وتتابعون وياها اغلبها علمية ولطيفة وتنبهكم عالتحاليل المطلوبة وشوفو اذا اكو احد يطلب هذي التحاليل 🤦🏽♀️
اكو حالات قليلة جدا تحتاج تسويها احنه نحددها مو انتو بس نسبة قليلة مو روتين👌🏽
يارب كل حامل تولد بسلامة طفل سليم ومعافى
د رحاب مجيد شريف
https://www.facebook.com/Dr.Rihabmajeed
from د. سيف سمير البياتي