نوبات الغضب عند الأطفال
نوبات الغضب موضوع متعب للابوين
يبدي من عمر مبكر بحدود السنه و ممكن يستمر إلى ٥ سنوات اذا ما تم علاجه
الموضوع يبدي من الصراخ و الضرب على الراس إلى التكسير و لا ينتهي بالفحطه ( نوبات حبس النفس !!!! )
الموضوع متعب ؟
اي متعب
زين ليش يصير ؟
نوبات الغضب ممكن تصير عند اطفال و ممكن ما تصير عند اطفال اخرين
بس هي شي طبيعي و لا تعني اي شيء نفسي
اكو عوامل تحفزها مثل الجوع او التعب او النعاس بس احيانا اكثر يستخدمها الطفل للحصول على ما يريد من اهتمام او حب او اي شيء ملموس
بهذا البوست راح نكمل و نشوف شون نتجنب نوبات الغضب و بالبوست القادم راح اسولف كيف نعالج النوبات
❤ حاول قدر الإمكان تمنعها انه تصير
❤ اهتم بطفلك خارج نوبات الغضب قدر الإمكان
❤ أكثر من الحضن لطفلك بالوقت اللي ما عنده نوبه غضب
❤ لا تنتبهله فقط من يكون ضايج و منزعج
❤ شجع و امدح اي تصرف إيجابي
❤ وفر الخيارات مثلا تلبس احمر او ازرق / تاكل تفاح او موز
❤ الاطفال ما يركزون هوايه لذلك شتته اول ما يبدي النوبه
❤ اختار معركتك يعني هو يختار الا ياكل حلويات و انت مخلي ٤ انواع كدامه و تريده ما ياكلهن مثلا !
❤ لو نعسان خليه ينام
و لو تعبان خلي يرتاح
اهم شي تتجنب النوبات
مهتمين بتكمله هذا البوست ؟
د. سيف سمير البياتي اخصائي طب الاطفال
from د. سيف سمير البياتي