دائما بجلسات الأمهات تلكه اسئله من قبيل ؟
ابنج شوكت مشى ؟
ابنج شوكت كال بابا ؟
ابنج شوكت يقرا؟
ابنج شوكت صار اجتماعي و يلعب ويه باقي الجهال ؟
ابنج شوكت بدا يتواصل وياك و يسمع كلامك ؟
ابنج شوكت بدا ياكل وحده ؟
الخ الخ الخ من الاسئله اللي هدفها واحد و هي المقارنه !
راح اكولك شي
للاسف ماكو جواب شافي لكل الخطوات
ماكو عمر ثابت و ساعه ثابته لكل الأحداث
الرحله طويله و طويله جدا
بيها ايام صعبه و ايام سهله
بيها ارتفاعات و انخفاضات
بيها تطورات و انتكاسات
مواضيع مالها علاقه بيك و بتحفيزك
و مواضيع الها كل العلاقه بيك و بابوه و تحفيزكم و تشجيعكم و صبركم و جهدكم
يوم تمشي الأمور
و يوم ما تمشي الأمور
دامك تتعبين تأكدي أن الأمور تمشي بالخطى المرسومه اله
ماكو طفل انولد و هو يعرف يكتب او يقرا او يسوق
و ماكو قانون يشمل كل الاطفال
ممكن الظروف تساعد ابن فلان في نقاط و تساعد ابنك في نقاط أخرى
اعرفي انك ما راح توصلين لنهاية الرحله بلحظه
و الرحله محتاجه مسافه
بس حطي عينك على الطريق و بس
ركزي ويه طفلك و بس
مالك علاقه ببقيه الركاب
صفر مقارنات هو هدفك
استفيدي من خبرات الاخرين من بعيد
و اخذي منها الامل
و اخذي اللي يناسبك
سامحي نفسك اذا تأخرتي بخطوه
او بديتي متأخر
كلنا راح نبقى عايشين
نسقط و ننهض.. نسقط و ننهض
د. سيف سمير البياتي اخصائي طب الاطفال
from د. سيف سمير البياتي