صباحكم خير
اليوم موضوعنا هو موضوع الأطفال اللي ما ياكلون الا اكلات محدده
اللي بالانكليزي يسموهم ال
Picky eaters
النصائح هن ٧ و اكيد ما تصير بيوم و يومين بس حافظ عليها و استمر
١. اكل ويه طفلك
هذه قد تبدو شغله بدييهيه بس مع الأسف الاغلبيه ما مطبقيها
اكل ويه طفلك يعني انت اكل و اتركه
لا تصيرين مثل مراقب عمل فوق رأسه و هاك و اخذ و ليش ما اكلت
لو اي واحد يسوي ويانا مثل ما بعض الأمهات تسوي اكيد ما راح ناكل
الاكل تجربه اجتماعيه للتواصل و لهذا تشوفوهم من يطلعون ياكلون او ويه بقيه الأطفال ياكلون
ماكو احد يحب يحس روحه مجبر على فد شي
2. سوي طقوس للاكل
انصب ميز طعام و خليه ياكل وياك
أكلوا كعائله
سد التلفزيون و كل الشاشات
خلي هذا الوقت مقدس للاجتماع الأسري و تناول الطعام
٣. شوي باعد بين الاكلات بمقدار ٢ و نص إلى ٣ ساعات
يعني مو ٢٤ ساعه شربت و حليب و عصير و مكيفه مسويته طبيعي و جبس و نستله و تكولين ابني ما ياكل
بدلي هذه الوجبات بالمي
خليه يشعر بالجوع
مثال بسيط
٨ و نص فطور
١١ و نص غداء
١٢ و نص قيلوله او لعب
٤ عصرونيه بسيطه
٦ و نص عشا
٧ و نص وقت النوم
هذا كمثال حتى تشوفون شكد الفتره بين الوجبات
٤. ماكو شي افتح حلكه و خلي بيه اكل
ما راح احجي هنا هوايه
بس تخيلي أحد دا يسوي هيجي بيك
ها شونه الاحساس؟
تاكلين بعد
فقط توقفي
٥. صيرله مثال
الأطفال متعودين على الامثله الجيده و السيئة
من انت ما تحب اللحم مو الا طفلك ياكل لحم
اني هسه ما احب البيض عادي جدا بنتي ما تحب البيض
من تريده ياكل لحم او قرنابيط او بطاطا اختار هذه الاكله و اكولها كدامه و تكلمي ويه والده او اي احد على الميز حول طعمه دون الاشاره ودون ما تحسسين الطفل
و ابدا لا تمتنعين عن تحضير طعام انت ما تحبيه
مثلا انت ما تحبين الفطر
يجوز طفلك يحبه
ليش حارمته منه
و ابدا لا تكولين اني ما احب فلان اكله
٦. هذا شويه يمكن يشوفوه الموظفات صعب
لا تحضرين وجبه وحده فقط باليوم خلي دائما المائده منوعه و بيها أكثر من صنف اكل بين قوسين ( رمضان يومي )
اذا تشوفوها صعبه اكو ٦ نقاط أخرى
٧. لا تنسين تسوين الاكله اللي يحبها من ضمن الوجبه
يعني يحب البركر سوي بركر و سوي وياه خضار منوعه ما يحبها
و لا تكوليله جرب الخضار
بس ضيفيها بالماعون اللي كدامه و هو شويه شويه راح يحبها
و لا تنسون المشاركه من الصفحه او نسخ الرابط في اي مكان تشاركون بيه البوست
