١٦ نصيحه اجتماعيه حتى تعدي اول شهرين من عمر طفلك
الفتره الاصعب
١. قللي عدد خطارك
اعرف بالعراق هذا شي اشبه بالمهمه المستحيله بس حاولي تعتذرين عن استقبال البعض اللي عندك ميانه وياهم باسلوب مهذب
٢. استغلي زوجك و اي احد قريب منك
الحلو بالوضع الاجتماعي عدنا انه الام من تولد يساعدوها الكثير من اهلها و أهل زوجها و زوجها أحيانا 😁😁😉
٣. لا تضغطي على نفسك و لا تجهديها انه تحصلين كلشي كامل
شويه شويه
ماكو شي كامل
الكمال لله
٤. حاولي ان تجدي صديقات من الأمهات و بالأخص الأمهات المثقفات الواعيات مو امهات الكحل و الثوم و البصل و هاي الخرافات
الصديقات ضروريات جدا
٥. اهملي كل النصائح الغير معقوله
اهمليها و لا كأنه سمعتيها
ادري الموضوع متعب بس دائما خلي قناع انه انت منعجبه باللي كاعد تسمعيه و لا تسويه
٦. تذكري دائما انه ممكن تربيه طفلك ما تنطبق عليها اي معلومه او اي شي متوقع
التربيه موضوع صعب و يحتاج إلى تجارب عده يلا تحصلين نتيجه
٧. حاولي ترتبين طفلك و نظامه من اول ايام
بس بالمقابل انه طفلك يخضع للروتين مو شي سهل
لازم تخليك اكثر تصميما على الموضوع
٨. ماكو شي اسمه سؤال غبي
اسألي طبيبك بأول زياره عن الأشياء اللي تشغل بالك
دائما اسال الأمهات بأول زياره اذا عدها سؤال عن اي شي
و قسم من الأمهات يكولون اسئلتهم بورقه و جدا احترم هالشي و اقدره رغم ضيق الوقت
٩. رتبي وضعيه خدمات طفلك يعني مكانين للنوم بالصاله و بغرفه الطفل او بغرفتك
مكان حفاظات مرتب و منظم و يفضل مكانين اذا كان بيتك من طابقين
١٠. الصور الصور الصور
اخذي هوايه صور لطفلك و لنفسك
هاي الفتره رغم صعوبتها الا انه هي قصيره جدا و تمر بسرعه
١١. البجي و الحفله مال طفلك باليل و المغرب هو هذا العادي و رغم كل المحاولات و العلاجات راح يبقى و هو شي عادي جدا و سيمر بس خليك صبوره
١٢. اهتمي بنفسك
الموضوع مو سهل بس لابد ترتاحين
تشوفين تلفزيون
تطلعين
تغيرين جو
١٣. دائما كولي لنفسك اني خوش ام
أبدا لا تقللين من شانك حتى لو الامور مو كلش تمام
دائما كرري مقوله اني خوش ام
١٤. حاولي ان لا تكرهي زوجك لان تره كلنا نكول ” يعني شنو كنت تسوين ” او ” ليش ما سويتي فلان شي” او ” لو مسويه فلان شي مو احسن ” فعادي عبريها
اعرفي انه هو هم يتعرض لبعض الضغوط بس اكيد مو بكد ضغوطك
١٥. اقري هذه الصفحه
كل كم يوم اقري البوستات القديمه و تابعي اولا باولا
خلي الصفحه مشاهده اولا
ما يحتاج تسالين
الصفحه ما خليت شي ما بيها
هي تلخص شغفي بطب الأطفال من اول كليه الطب إلى اليوم
يعني خلاصه ٢٠ سنه تقريبا من دراسه طب الأطفال
و من هذا البوست اشكر الزميلات الأمهات الرائعات اللي اقترحوا عليه اسوي الصفحه
١٦. هذا الوقت سيمر و الامور ستتحسن تدريجيا اطمئني فقط
د. سيف سمير البياتي
اخصائي طب الأطفال
