#التربية
#لاتبچي!
الجزء الثالث
#هو_فرعون_منو_فرعنه
الطفل شديد الذكاء 🤓
كلشي يسوي عباره عن تجارب..👨🔬
ويلخص من التجارب نتيجه التجربه.. 📉
وبكل مره يسوي تعديلات على “عناصر التجربه” ليرى الاختلافات ب “النتيجه”
✳️مثال محسوس:
حطيتي كوب ماء 🥛 وماعون اكل 🍛 كدام الطفل على كرسي الطعام (عمره بحدود سنه) حتى يتغده
اكل شويه وراها كام يحط الاكل داخل الكوب ويشوف الاكل داخل الكوب🥛
بعدين صب المي على الماعون 😁
بعدين طبش بالمي الي بالماعون
بعدين دار المي والأكل على ميز الطعام
بعدين كام يطبش بالمي والأكل الي صار على الميز ويجعصه .. 🖐️✊
هاي الحركات حيل مستفزه لأغلب الأهالي ..😂
لكن هي في الواقع تجربه علميه حقيقه! 👨🔬
وبكل خطوه سواها اكتشف نتيجه معينه. 👍
من تلون الماء..
إلى تخفيف الاكل..
إلى قوام الماء على الماعون
إلى انسكاب الماء
الى قوام الماء على الميز
من عدا الاصوات المختلفه والطعم المختلف وووو
زين كمل وغسلنا ونظفنا وراحت السالفه 😪
ثاني يوم هم رجع يسوي كل هذني !!
لا عفيه دكتوره ممعقوله هسه افتهمنا تجربه خوما كلساع.!🥴
هههههههه
للاسف اي كلساع وكل يوم الى أن يثبت النتائج 📉
رجع سوى كل هاي الخطوات بس الاكل جان غير صنف..😍
ونتيجه التجربه جان اكو اشياء متطابقه واشياء لا
مثلا المي هم تكدر (صار عكر) مثل المره السابقه..
لكن القوام صار مختلف ! ووووو
هسه هذا الحجي شعليه بالبجي؟ 🙄
اني اكلج شعليه..🤓
التجربه الي تهمنا اليوم هو استخدام البكاء الشديد 😭لتحقيق مطلب معين (سواء مطلب مشروع أو غير مشروع)
نرجع للبدايه ..
اذا من هوه صغير (حديث ولادة) 👶
وصل لنتيجه أنه محد ينفه اله (ينتبه اله)
ومحد ينفذ اي طلب الى ان يفحم 🌚 ويزرك ويخضر ..
مبروك 🎉 👏
انتي برمجتي الطفل على أن يكون
◀️متطرف بالتعبير وحياخذه نمط حياته ..
◀️ ماعنده تفاهم اي شي يريده كبل يبلش صريخ وعياط .. ليش؟ لان انتي هيج علمتي..
🔸من جان يبجي بهدوء ويطلب بهدوء مباوعتي عليه اصلا!
الا ازرك يلا !
ومو مره ومرتين ..
بعد عليش يبقى يستخدم الأسلوب الهادئ؟؟ 🤔
وعليه لحل المشكله ، لازم تبدين تصلحين ..
الاصلاح حياخذ وقت وجهد من ناحيه
اول شي انتي تكونين هادئه حتى يتعلم منج شوي الهدوء
وتركزين وياه أن تكون استجابتج سريعه من يطلب بطرق غير البجي والصريخ (يعني تصيرين نبهه لاي اشاره منه)
وثاني شي من يبدي يحجي حتى تتحاورين وياه وتقنعي
وثالث شي التدريب المستمر ..
⁉️زين اني معلمته هيج .. من يبجي استجيب .. لكن هو فجاه كام كبل يصرخ 🤔
📩اذا صغير دون السنتان أو دون سنه ونص تقريبا فهذا اله سبب
شنو السبب؟
🏷️مرض جسدي (اكو مصدر الم -تسنين غالبا-)
🏷️مرض نفسي (الم نتيجه إهمال وحده وملل أو توتر )
عرفي السبب وعالجي باسرع وقت👍
📩اذا اكبر بحدود عمر (سنه و٨ شهور او سنتان )
فتصرفات الطفل تتغير بشكل جذري بهاي المرحله (المراهقة الاولى) ويبدي يجرب تصرفات ممسويها قبل ..
يعني الطفل الهادئ الحبوب شو فجأة صار عصبي ويصيح ويرفس ! 😐
نعم هذا صحيح.. 👍
هذا جزء من تطور الطفل الطبيعي 😅
⏪في هذه المرحله يبدي يسوي تجارب لتصرفات مألوفه (مسويها قبل) وغير مألوفة (ممسويها قبل) ويبدي يطلع نتائج جديده.🤓📉
⁉️زين شسوي؟😐
🔸 اهملي والبسي فعليا
🔸وابعدي عنه الاشياء الي ممكن تاذي
🔸وانتظري تخف نوبه الصراخ
🔸وراها توجهي عليه احضني بهدوء وكولي له من تصيح كلشي ما افهم .. ومسحي دموعه وكولي له شتريد بكل هدوووء ..
تكرر الموقف؟ ⁉️
🔸استجيبي نفس الاستجابه
🖐️🛑وديري بالج تنفذين وهو بقمه الصراخ🛑🖐️
لان انتي بهذا التصرف عززتي هذا الأسلوب عنده .. كأسلوب مشروع .. وقابل للتفاوض .. وأسلوب ممكن ينجح.. ويرجع يستخدمه بدل المره الف ويستبزج بي فعليا .
بكل مكان
وبكل مناسبه يحسج بيها محرجه
بالشارع🛣️.. بالمحل🏬.. يم الخطار وووو
ينبطح ويصيح ويرفس😑
اني عندي هذا الشي خط احمر ❌
مجرد يوصل ابني لهذا النمط من التعبير ينتهي كل النقاش وحتى لو ناويه جنت اتفاوض اوقف التفاوض واحرمه أيضا من الشي الي جان رايده .
ليش ؟
حتى يتعلم اسلوب التفاهم والحوار
الحياة مو صريخ
ولا كلشي تحصله بالصريخ
من يحجي عدل او يطلب عدل اتفهمه..🧡
وحتى لو بجى من باب الرغبه الشديده أيضا اتفهمه.. 💜
وما استفزه .. ابد .. اعامله باحترام كامل بدون تسفيه♥️
بس من يكوم يرفس ويصرخ بوجهي معلنا التمرد لاااا
لهنا وبس
هنا خط احمرررر ❌
ما انكر اني هم مرات اغلط وانفعل ..😡
لكن الانفعال هنا اقل ضررا من تحقيق مطلب الطفل
⏪انفعالج هنا حينكتب عنده نتيجه هاي التجربه ماما عصبت
ماما اهملتني
وختاما محصلت الشي الي صرخت علموده
🛑 “وهذا اهم شي مو تنفعلين وتالي تنطي الشغله”🛑
⏪أما لو تعاطفتي وياه
للاسف حيطلع بنتيجه ماما كلما اعيط بوجها تخاف
وتنطيني الشغله الي اريدها بسرعة 👎
والنتيجه ابني نوبات الغضب عنده جدا جدا قليله (مقارنه باقرانه) ..
يبجي اي صح وما امنعه يعبر بالبكاء.. بس التمرد والصريخ لا ممنوع
🎥موقف شفته فعليا بأحد الاسواق التجاريه :
طفله بعمر سنتان ونصف تقريبا .. امها وأبوها وياها حاطيها بعربانه التسوق .. 🛒
و واضح عليهم جدا جدا الارتباك والخووووف فعليا من الطفله 😅
والطفله واضح عليها السيطره التااااامه 😂
بحيث هي تكول منا (تأشر باصبعها على القسم الي تريد يفوتون بي) وهمه ينفذون 😅
إلى أن وصلوا يم ستاند بي جلاتين كالت اريد ..🍬
هنا الام انطتها وحده ..
الطفله كالت بعد .. وبكل ثقه 😌
الام بدت ترتبك.. وكالت لها لا ميصير بس وحده (وبصوت ناصي )
والله فرق ثواني بين كلمه ال لا وبين عيطه الطفله بقوه وتحدي ماااااااا
ارييييييد بعدددد وترفس برجلها 😆
قسما بالله لو بنتي هيج كوه الزم نفسي ما اشمرها من العربانه 😂
بس اوكي لهنا الحد الفاصل ..
لهنا كل الأطفال ممكن يسوون هذا الشي ..
المصيبه والطامة هي أنه الاب تنرفز لان الكل انتبه عليهم وعلى عياطها وكال للام دفضيها يمعوده وأخذ الجيلاتين الثاني مدري الثالث 🍬🍬🍬
وانطاه للطفله وتحركوا 😅
ومبروك 🎉
انتصرت الطفله للمره الالف 😂✋
وحتسوي هذا الأسلوب بكل مكان وبكل مناسبه وحتصير شخص اناني مستفز ماعندها لا اسلوب حوار ولا ادب تعامل
فأتمنى منكم متوكون بهذا الخطأ
زين لعد شنسوي؟ 🙄
بالبوست القادم احجيلكم بادق التفاصيل..
لان حيصير البوست اطول من سبات اهل الكهف 😅
وهنا اسئلكم من طفلكم يستفزكم ويصرخ كدام الخطار لو بالشارع لو بالمول .. شتسوون؟ شاركونا تجاربكم..
مع مودتي 🌷
د.اسماء اسماعيل البدري
