السلام عليكم
اليوم حابة احجي وياكم بوضوع كلش شائع عدنه وهوايه اشوفه بلعيادة وبلمراكز الصحية
قلع الاسنان, هوايه ناس يفضلون يمشون بهالطريق حتى لو كانت اسنانهم تحتاج حشوة بسيطة….زين ليش اشلع سني؟ معقوله علمود الم ليله وحدة اشلع سني واستغني عنه
زين شلعت سنين وتلاثة واربعة وانت بعدك\بعدج بمرحله الشباب على شنو راح تاكلون بعدين؟
واكثر شي يقهرني من وحده يجيبها زوجها دكتورة اشلعيلها اسنانها….يابة تحتاجهم وبعدها صغيره كلها تتعالج بحشوات يكلي واني ابقى اروح واجي اشلعي واشدلها تخم!
يعني معقوله احد يقتنع بانه شي صناعي لو شماكانت مادته زينه حيعوض شي خلقه الله النه؟ زين تعرفون شكد يحتاجلها مراجعات واجور؟ اني بلنسبة الي يكلي اشلع اسناني واحط تخم احسه بلضبط مثل الي يروح لطبيب ويكله هذا الجرح برجلي مااتحمله كصها واحط رجل صناعية…..يمكن تشوفوها مبالغة بس تره هو نفس المبدأ.
اني طبيبه اسنان واكلكم ماكو شي يعوض اسنانكم الحقيقية….متتخيلون شنو مشاكل ممكن تصير ويه الجسور الثابتة او المتحركة, من غير المراجعات والاجور العالية بس هي تحتاج عناية …والشخص الي ميفرش اسنانه مستحيل حيعرف يهتم بنظافة التخم او الجسر, من غير انها تحتاج ادامة وتبديل كل فترة هاي اذا اصلا كدرتوا تستخدموها
اكو نسبة موقليله من الناس تتحسس من التخم,او مترتاح لا بالاكل ولابلحجي…. حتى طعم الاكل ميبقى نفسة…فليش اعرض نفسي لهلشي
المراجعات الدورية لطبيب الاسنان حتخليك تكتشف التسوس بوقت مبكر وتحلها بحشوات بسيطة او حتى حشوات جذور الي هواية ناس بس يسمعون بيها يقررون يقلعون اسنانهم
العلاج ابدايتة هو وقاية وعلاج في ان واحد.
تعديل على البوست: الي حبيت اوصلة الكم انه الواحد لازم يحسب المضار على المدى البعيد مو بس يفكر بالمنافع للمدى القصير.
وشغلة ثانية الاغلبية تعليقاتهم جانت جارحة ومولطيفة اني تره مااستفاد شي سواء انتوا حافظتوا على اسنانكم اوقلعتوها…. اني انصح بلشي الصحيح يبقى انتوا تاخذون بالنصيحة او لا هالشي راجع الكم…… اني اذا شخص واحد استفاد من الشي الي داقدمة فإني كلش اكون فرحانة بهالشي واحنه كلنه الي ننشر بهاي البيج لاكاتبين عناوين عياداتنه ولأنريدكم تراجعونه، احنه نحب ننصحكم للشي الصحيح ونغير المفاهيم الخاطئة عند الناس.
مع تحياتي
د.همسة الدهان
#همسة_الدهان
#الاهتمام_بالاسنان
