#التربية_الدينية
#الايمان_في_زمن_الكورونا
ملاحظة: البوست اجتهاد شخصي، لم اعتمد على مصدر معين،
هو حسب اعتقادي مناسب للاطفال بعمر النقاش والحوار، حوالي ٥ سنوات واكبر
⭕⚠️موجه للاهل الي يرغبون بتعليم أطفالهم مبادئ الدين الاسلامي⚠️⭕
👦ماما مين اجى كورونا؟
🖍️حبيبي لحد الان ممتاكدين، ممكن البشر سوه، وممكن انتقل من الحيوان للانسان
👦يعني رب العالمين ديعاقبنا؟ وهو خله الفايروس ينتقل للإنسان؟
🖍️لا حبيبي رب العالمين اذا يريد بلحضه ينسف الأرض والي بيها،
بس هذا يسمى بلاء ، حتى نراجع نفسنا ونصلح من اخطاءنا
👦شنو اخطاءنا ماما؟
🖍️هواي أخطاء حبيبي
اول شي هو الاسراف، والمبالغة
يعني كثره الطعام غير الصحي , كثره الأوساخ، كثره المخلفات من المصانع، كثره الازدحامات،
كثره الكسل وعدم الحركه والتمارين
كل هاي تخلي الإنسان وكوكب الأرض يحتضر
من اجى الفايروس اليوم رغم كثره الاضرار، لكن الإيجابيات ايضا عظيمه
ابسطها ، طبقه الاوزون الي انسدت ، والي اصلا انفتحت بسبب كثره التلوث
👦يعني رب العالمين دينقذنا؟
🖍️اكيد حبيبي, رب العالمين ينطينا هواي فرص، وبكل مره يدز بلاء هو للتنبيه ، حته نراقب نفسنا ونراقب افعالنا
رب العالمين كال بالقران : “”ظَهَرَ ٱلْفَسَادُ فِى ٱلْبَرِّ وَٱلْبَحْرِ بِمَا كَسَبَتْ أَيْدِى ٱلنَّاسِ لِيُذِيقَهُم بَعْضَ ٱلَّذِى عَمِلُواْ لَعَلَّهُمْ يَرْجِعُونَ”
يعني هذا الفساد الي صار هو بسبب فعل الناس، وهسه ارسل علينا بلاء حته نراجع نفسنا، ولانبقى نتمادى ..
وبعدها نستغفر ونطلب العفو منه حتى يرفع عنا هذا الاختبار الصعب ..
👦ماما يعني هسه اذا اكول استغفر الله رب العالمين حخلي كورونا تروح؟
🖍️حبيبي كلمه (استغفر الله) لازم وياها فعل . لا يكفي الكلام.. من نكول أستغفر الله يعني نطلب المغفره من الله
وطلب المغفره لازم بالفعل وبالقول,
📍يعني مو نكول أستغفر الله، ونذب الأوساخ بكل مكان!
📍مو نكول أستغفر الله ، واحنا من نتمرض نكح بوجه الناس! ونخليهم يتمرضون ويانا،
📍مو نكول أستغفر الله ، واحنا ناذي الصغير , ونضرب الحيوان
📍مو نكول أستغفر الله واحنا ناذي جسمنا بالاكل الموصحي ،
📍مو نكول أستغفر الله ، واحنا منتسامح بيناتنا..
قال النبي محمد صلى الله عليه وسلم : “ارحموا من في الارض يرحمكم من في السماء”
د.اسماء اسماعيل البدري
