#التربية
تعليق كتبته إحدى الامهات الرائعات في أحد الكروبات المميزة , تنقل تجربتها في التربية:
عن تجربة وية بنتي الكبيرة
عمرها ٣ سنوات و نص
حددت تقريبا لكل شغلة عقاب
مثلا هي تعرف من اطلب منها تلم الملاعيب و متقبل اكرر الطلب مرتين و بالثالثة اجيب جيس كبير و الم بيه الالعاب اللي بالكاع و اضمهم لمدة يوم
اذا تضرب احد فعقابها تنحرم من الكارتون يوم كامل ..حتى اذا صار الضرب قبل وقت النوم فتنحرم اليوم التالي
اذا شمرت لعبة على شخص اكوللها معناها متريدين هاي اللعبة و تنحرم منها
جتي فترة كانت تتفل و تعفط العفو فهمناها اني و ابوها انه من تتفل ريحة حلكها تصير مطيبة و نسوي نفسنا نشتم حلكها و نكوللها ايع ريحته مطيبة . و اخذها اغسللها حلكها كلما تعفط لحد ما بطلت .
بس بصورة عامة الحمد لله دتمر ايام يللا احتاج استخدم اي عقاب
لأن اولا اني متبعة وياها طريقة الصداقة و ابينلها حبي .. على طول احضنها و ابوسها و ادغدغها
امدحها هواية هواية حتى من دتلعب وحدها و كلشي ما مسوية اكوللها اني فخورة بيج دتلعبين حلو و خليتيني اكمل غسل المواعين .. عفية بالحبابة شكد حلو اجيتي غسلتي ايدج بدون ما اطلب منج .. فدوة شكد حلو كاعدة ويانا عالميز دتاكل مثل الاميرات ….الخ
بحيث اني مشبعة حاجتها للاهتمام بتركيزي على افعالها الزينة فبعد متحتاج تسوي اشياء موزينة حتى تجذب انتباهي
و شغلة ثالثة اني ما متوقعة منها المثالية .. يعني ميخالف خلي مرة مرتين تعصب و تعيط اتجاهل او اتظاهر بالموافقة .. مثلا تلح على حلويات و تتعصب ما اكوللها لا بس اكوللها اني موافقة لكن ورة الغدة مو هسه
اشبع هم حاجتها للاستقلال . يعني بالحمام مثلا خليتلها ستول صغير تروح تصعد بنفسها تغسل ايدها من تتوصخ .. و خليت الكلاصات البلاستك بمجر قريب من تريد مي تجيبلي الكلاص حتى اصبلها .. اخليها مرات تختار ملابسها و لا بأس اذا مرة عاندت مثلا و رادت تبقى بهدوم الطلعة ورة ما رجعنا اخليها فد ساعة او ساعتين و بعدين ابدللها
من تغلط و تكول اني اسفة اقبل اعتذارها و اطلب منها بعد ما تعيدها
حتى من تتعارك هي و اختها الصغيرة على شي اعلمها طريقة التصرف الصحيحة اكوللها مثلا ،لا تجرين اللعبة من ايد اختج جيبيلها غير لعبة و هي هسه تترك اللي بيدها
و فعلا كامت تسوي هالشي تنطي بديل لاختها او اسويلهم دور على استخدام اللعبة او الهي الصغيرة بشي
ما اكول اني ام مثالية بالعكس كومة عندي اغلاط من ناحية وقت التلفزيون او النوم و الاكل لكن عندي اهم شي انه يتم كلشي بحب .
و الحمد لله على توفيقه…
نقله لكم
د. أسماء إسماعيل البدري ❤️
تعديل 1: شفت أمهات مستنكرين الطريقه، بس لان صاحبه التجربه سمت (تعديل السلوك) ب العقوبة
العقوبه من جنس العمل، والعقوبه نتيجه العمل هي أساس التربيه.. يمكن هي ما اختارت المصطلح الدقيق ، لكن هي دتطبق بشكل رائع
رجاءا يا امهاتنا … انتبهوا للمغزى لا تباعون على الكلمات وتوكفون على كل كلمه!!!؛ متكلولي شلون رح تربون لعد! وتقصدت ما اعدل كلماتها لان هي بالاخير حجت تفاصيل كلش كافيه ووافيه
