توتر الفراق و منو مننا ما مر بيه
و هو يصير لما طفلك بعمر ٩ اشهر إلى سنه يبدي يبجي عليك و يريدك من تودعه او تودعيه
و بالأخص لما تخلص اجازه الامومه
التجربه مؤلمه و صعبه
بس اكو امور تهونها حبيت اشارككم بيها
🦁 العب مع طفلك الغميضه او وين راح الطفل
هذه راح تدربه على فترات الوداع القصيره
🦄 لعبه أخرى انه تغطي راسه ببطانيه و تكول وين راح فلان و بعدين تشيل الغطاء و تكول هيانه
هذه من الالعاب اللي كلش يحبوها
🐑ابدي لفترات وداع قصيره حتى لو ما يفهمك
” ماما راح تروح للحمام ابقى هنا ”
ماكو مشكله اذا لحكك بس احجي وياه من خلف الباب لا تخليه يشوفك
🐇قبل ما ترجعين للدوام حاولي قدر الامكان تنفصلين عن طفلك اول يوم ثلث الفتره مال الدوام
ثاني يوم نص الفتره
ثالث يوم كل الفتره
يعني اذا دوام ٦ ساعات
اول يوم ٢ ساعه
ثاني يوم ٣ ساعه
ثالث يوم ٦ ساعه
🐥 عرفيه مبكرا على اللي راح يبقى يمهم مثل الحضانه او اي احد راح يتولى رعايته
🕊اذا من النوع اللي تقسمين الشغل بينك و بين زوجك اعطيه بعض واجبات الطفل
مثلا يلا روح خلي بابا يغسل لك
او خلي يفرش اسنانك
او بابا ينطيك اكل
🦆 لا تنسين طفلك كلش يحب حاجاته فمن توديه لروضه او حضانه اول ايام اخذي وياك اغراضه او لعابته اللي يحبها
كلش راح تقلل توتره
🐧 سوي الخطوات الفوك بخطوات ثابته لا تردد و لا تراجع
🐝 ودع بحفاوه و بضحكه لا بحزن و قهر
ودع و لا ترجع
من ترجع راح تصير الامور أسوأ
د. سيف سمير البياتي
اخصائي طب الأطفال
